Aqrar-sənaye kompleksi

Ana səhifə

Astarada taxıl anbarları və soyuducu kamera tikilir

19 oktyabr 2010 16:03 (UTC +04:00)

Astara. Ağəddin Babayev - APA. Azərbaycanın Astara şəhərində hər birinin tutumu 1000 ton olmaqla üç taxıl anbarının və meyvə-tərəvəz məhsullarının saxlanması üçün 250 tonluq dəmir konstruksiyalı soyuducu kameranın tikintisi aparılır.

Bu barədə APA-nın cənub bürosuna Astara Rayon İcra Hakimiyyəti (RİH) aparatından məlumat verilib.

Bu obyektlər Fövqəladə Hallar Nazirliyinin (FHN) sifarişi ilə inşa olunur. Şəhər kənarında 1 hektarlıq ərazini əhatə edən taxıl anbarlarının və soyuducu kameranın tikintisi Sumqayıt şəhərindəki 1 saylı tikinti idarəsi tərəfindən həyata keçirilir.

Hər üç taxıl anbarının tikintisində işlər artıq tamamlanmaq üzrədir. İndi əsas diqqət soyuducu kameranın inşasının qısa müddətdə başa çatdırılmasına yönəldilib. Obyektdə dəmir-beton konstruksiyalarının quraşdırılması işindən sonra Türkiyədən dəvət olunan mütəxəssislərin səyləri ilə əsas avadanlıqların quraşdırılmasına başlanacaq. Astara RİH-dən bildirilib ki, bu obyektlərin təkcə rayonda deyil, ümumən cənub bölgəsində taxılçılığın, tərəvəzçiliyin və meyvəçiliyin inkişafında mühüm rolu olacaq.

Qeyd edək ki, taxıl anbarları kompleksinin və soyuducu kameranın 2011-ci ilin əvvəllərində istifadəyə verilməsi nəzərdə tutulub.