Aqrar-sənaye kompleksi

Ana səhifə

Azərbaycanda kənd təsərrüfatı istehsalı bu il 3% azalıb

23 oktyabr 2010 16:16 (UTC +04:00)

Bakı. Nicat Mustafayev – APA-Economics. Bu ilin oktyabrın 1-i vəziyyətinə Azərbaycanda 936,3 min hektar taxıl sahəsi (qarğıdalısız) biçilib döyülüb və həmin sahələrdən ilkin çəkidə 1,863 mln. ton taxıl məhsulu götürülüb.

Dövlət Statistika Komitəsindən «APA-Economics»ə verilən məlumata görə, hektarın orta məhsuldarlığı əvvəlki ilə nisbətən 6 sentner azalaraq 19,9 sentnerə enib. Bundan başqa, cari ildə 26,4 min hektar qarğıdalı sahəsindən qıçaları quru dənə çevirməklə 120,8 min ton məhsul toplanıb, hər hektardan orta hesabla 45,8 sentner qarğıdalı dəni götürülüb. Qarğıdalı dəni nəzərə alınmaqla ölkə üzrə taxıl istehsalı 1 983,8 min ton olub.

Mövsüm ərzində sahələrdən 928,1 min ton kartof, 1 104,7 min ton tərəvəz və 428,3 min ton bostan məhsulları toplanıb. Keçən ilin müvafiq dövrünə nisbətən kartof istehsalı 4%, bostan məhsulları istehsalı 5,4% artıb, tərəvəz istehsalı isə eyni səviyyədə qalıb. Eyni zamanda, hektarın orta məhsuldarlığı kartof üzrə 1 sentner, tərəvəz üzrə 2 sentner azalıb, bostan məhsulları üzrə isə 4 sentner artıb və uyğun olaraq 144, 140 və 135 sentner olub.

Ötən ilə nisbətən cari ildə pambığın əkin sahəsinin 42,2% artması məhsul istehsalında da özünü göstərib. Belə ki, oktyabrın 1-i vəziyyətinə emal müəssisələrinə 12,1 min ton və ya keçən ilin müvafiq dövrünə nisbətən 45,8% çox xam pambıq yığılıb satılıb.

Cari ildə pambıqçılıqla yanaşı tütünçülük sahəsində də artım olub. Belə ki, əkin sahəsinin 12,6% artması tütün yarpağı istehsalının 44,5% artmasına səbəb olub və qurudulmuş çəkidə 2,5 min ton tütün yarpağı yığılıb.

Bu il ərzində həmçinin, 8,5 min hektar sahədə emal üçün şəkər çuğunduru əkilib. Hazırda bu məhsulun yığımına başlanılıb və hesabat tarixinə artıq 1 690 hektar sahənin çuğunduru qazılıb və həmin sahələrdən hər hektardan 341 sentner olmaqla 57,7 min ton məhsul götürülüb.

Hesabat tarixinə həmçinin, 416 min ton və yaxud keçən ildəkindən 1 730 ton çox meyvə və giləmeyvə, 79,8 min ton və yaxud 2 989 ton çox üzüm məhsulu toplanıb. Yaşıl çay yarpağı yığımı isə 30,1% artaraq 468,5 tona çatıb.

Cari ilin doqquz ayı ərzində ölkə üzrə diri çəkidə 241,8 min ton ət, 1 157,5 min ton süd, 903,1 mln. ədəd yumurta və 14,8 min ton yun istehsal edilib. Ötən ilin müvafiq dövrü ilə müqayisədə ət istehsalı 6,4%, süd istehsalı 7,6%, yumurta istehsalı 0,8%, yun istehsalı isə 2,5% artıb.

Oktyabrın 1-i vəziyyətinə ölkə üzrə 2 616,4 min baş qaramal, o cümlədən 1,260 mln. baş inək və camış, 8 458,5 min baş qoyun və keçi mövcud olub. Ötən il oktyabrın 1-i ilə müqayisədə qaramalın sayı 1,4%, o cümlədən inək və camışların sayı 0,8%, qoyun və keçilərin sayı isə 1% artıb.

Cari ilin yanvar-sentyabr aylarında kənd təsərrüfatının ümumi məhsulunun faktiki qiymətlərlə dəyəri 2 894,3 mln. manat olub. Onun sabit qiymətlərlə dəyəri keçən ilin müvafiq dövrü ilə müqayisədə 3,4%, o cümlədən bitkiçilik məhsulları üzrə 9,2% azalıb, heyvandarlıq məhsulları isə 6,2% artıb. Kənd təsərrüfatının ümumi məhsulunun artım sürətinin keçən ilə nisbətən aşağı düşməsinə cari ildə taxıl istehsalının 981,6 min ton (33,1%) azalması təsir göstərib. Odur ki, taxıl istisna olmaqla bütövlükdə digər sahələr üzrə kənd təsərrüfatının ümumi məhsulu cari ilin doqquz ayında keçən ilin eyni dövrünə nisbətən 5,1% artıb.

Oktyabrın 1-i vəziyyətinə ölkənin meşəçilik təsərrüfatlarında istehsal edilib məhsul və xidmətlərin faktiki qiymətlərlə dəyəri 1 160,1 min manat olub.

Balıqçılıqla məşğul olan təsərrüfatlar tərəfindən 85 min manat dəyərində balıq ovlanıb.