Aqrar-sənaye kompleksi

Ana səhifə

Dünyada yeni ərzaq böhranı yarana bilər

08 noyabr 2010 13:23 (UTC +04:00)

Bakı. Əli Əhmədov - APA-Economics. Cari ilin oktyabr ayında dünyada ərzağın qiyməti sentyabra nisbətən 4,45 % və ya 8,4 pillə yüksələrək 197,1-ə qalxıb.

«APA-Economics»in məlumatına görə, BMT-nin Ərzaq və Kənd Təsərrüfatı Təşkilatının (FAO) məlumatına görə, 2008-ci ilin fevral-iyul aylarını nəzərə almasaq, bu, ərzağın qiymətinin son 20 ildə ən yüksək həddə çatmasıdır.

Qiymət artımının əsas səbəblərindən biri Braziliyadakı quraqlıqdır. Dünya qənd ixracının 50%-dən çoxunu həyata keçirən Braziliyadakı quraqlıq qənd qıtlığına səbəb ola bilər. Nəticədə mart ayı üçün fyuçers müqavilələrində şəkərin funtu 32,3 sentə və ya kiloqramı 71,06 sentə qalxıb. Bu rəqəm 1981-ci ilin yanvarından bəri şəkərin ən yüksək qiymətidir. Havaların pis keçməsi isə gələn il taxıl istehsalını 5% azaldacaq. Artıq bəzi iri şirkətlər - “Kraft Foods”, “Kellogg”, “McDonald’s”, “Nestle” öz məhsullarının qiymətini artıracaqlarını bəyan ediblər.

Afrikada isə ərzaq qıtlığı ilə bağlı proqnozlar əsl təşviş yaradıb - Qananın kənd təsərrüfatı naziri baş verə biləcək un qıtlığının qarşısını almaq üçün ölkə əhalisini çörəyə alternativ tapmağa çağırıb. Hökumət nümayəndəsi sakinlərə çörək bişirmək üçün ehtiyat variantlar tapmağı məsləhət görüb. Bu ölkədə çörək əhalinin rasionunda böyük yer tutduğuna görə qiymətlərin artması əhalinin böyük hissəsini aclıqda qoya bilər.