Aqrar-sənaye kompleksi

Ana səhifə

«Azərtoxum» şirkətinin dizaynerləri Barselonada keçirilən Dünya Memarlıq Festivalında mükafatlandırılıb

11 noyabr 2010 16:07 (UTC +04:00)

Bakı. Nicat Mustafayev - APA-Economics. Barselonada (İspaniya) Dünya Memarlıq Festivalı keçirilib.
Azərbaycan İqtisadi İnkişaf Nazirliyindən «APA-Economics»ə verilən məlumata görə, festival çərçivəsində keçirilən müsabiqənin «Ən yaxşı istehsalat, enerji və təkrar emalı binası» kateqoriyasında Yevlax rayonunda yerləşən «Azərtoxum» MMC-nin inzibati-təsərrüfat kompleksi qalib gəlib. Kompleksin layihəsinin dizaynını tərtib etmiş Türkiyənin «TOCA» şirkəti mükafat ilə təltif olunub. Memarlığın müasir nailiyyətlərindin biri olan bu layihə dünyanın ən tanınmış memarları və bu sahənin məşhur mütəxəssisləri tərəfindən 61 ölkəni təmsil edən 500-dən artıq iştirakçı arasından seçilib.
Qeyd edək ki, «Azərtoxum» MMC Yevlax rayonunda 7 hektarlıq ərazidə yerləşir. Kompleks cari ilin oktyabr ayında fəaliyyətə başlayab. Əhalinin və fermerlərin superelit, elit və yüksək reproduksiyalı taxıl toxumları ilə təmin edilməsi üçün Yevlax rayonunda müasir tələblərə cavab verən toxumçuluq təsərrüfatı məqsədilə yaradılmış bu kompleks ölkədə yeni və yeganə inteqrasiya olunmuş toxum təsərrüfatıdır. Saatda 100 ton taxıl və 9 ton toxum təmizləmək və saatda 36 ton taxıl qurutmaq gücünə, həmçinin taxıl saxlama gücü 15 min ton, toxum saxlama gücü isə 10 min tona malik olan müəssisə daimi olaraq 160 nəfər işçini işlə təmin edir. Eyni zamanda «2008-2015-ci illərdə Azərbaycanda əhalinin ərzaq məhsulları ilə etibarlı təminatına dair Dövlət Proqramı»nın icrasında rol oynayan bu müəssisə toxum idxalının azaldılması məqsədini də daşıyır.
Xatırladaq ki, «Azərtoxum» MMC-nin təsisçiləri Türkiyə və Azərbaycanın özəl sektorundan olan sahibkarlar və Azərbaycan İnvestisiya Şirkətidir.