Aqrar-sənaye kompleksi

Ana səhifə

Ağcabədi rayonunda heyvandarlıq sərgisi keçirilib

03 dekabr 2010 13:26 (UTC +04:00)

Bakı. Nicat Mustafayev – APA-Economics. Bu gün Ağcabədi rayonunun Rəncbərlər kəndi yaxınlığında mərkəzi bölgədə ilk dəfə olaraq heyvandarlıq sərgisi keçirilib.

Aqro İnformasiya Mərkəzindən (AİM) «APA-Economics»ə verilən məlumata görə, sərgi İsveçrə hökumətinin maliyyə dəstəyi ilə AİM və İsveçrənin «HEKS» təşkilatının birgə həyata keçirdiyi «Kənd İnkişaf Layihəsi» çərçivəsində keçirilib. Tədbirin keçirilməsində məqsəd süni mayalanma üsulu ilə alınmış heyvanların nümayişi və bu üsulun üstünlüklərini nümayiş etdirməkdir.

Sərgidə Ağcabədi rayonunda süni mayalandırma yolu ilə əldə edilmiş heyvanlar nümayiş etdirilib, sərgi iştirakçıları dövlət və özəl sektordan olan süni mayalandırma texnikləri ilə ünsiyyət qurub, onların iş prinsipi və texniki avadanlıqları, həmçinin yem istehsalçılarının və baytarlıq apteklərinin məhsulları ilə tanış olublar.

Tədbirdə Azərbaycan Nazirlər Kabineti, Kənd Təsərrüfatı Nazirliyi, yerli icra hakimiyyətləri, eləcə də yerli və beynəlxalq təşkilatların, Süni Mayalandırma Assosiasiyasının, baytarlıq laboratoriya və idarələri nümayəndələri, fermer və kənd təsərrüfatı mütəxəssisləri iştirak edib.

Qeyd edək ki, eyniadlı tədbir dekabrın 7-də Beyləqanda keçiriləcək.