Aqrar-sənaye kompleksi

Ana səhifə

Azərbaycan Kənd Təsərrüfatı Nazirliyi: “Taxıl və una ƏDV-nin ləğvi çörəyin bahalaşmasına imkan verməyəcək”

06 dekabr 2010 15:36 (UTC +04:00)

Bu barədə «APA-Economics»ə açıqlamasında Azərbaycan kənd təsərrüfatı nazirinin müavini Aslan Aslanov bildirib.

Onun sözlərinə görə, bu qərarın verilməsi nəticəsində bu sahədə qiymətlərin süni artırılmasının və ya buna cəhdlərin qarşısı alınacaq: “Bununla bağlı İqtisadi İnkişaf Nazirliyi də müvafiq işlər aparır”.

A.Aslanov bu qərardan sonra ölkədə çörəyin qiymətinin bir qədər ucuzlaşacağını da istisna etməyib: “Amma qərarın əsas məqsədi bundan sonrakı qiymət artımlarının qarşısını almaqdır”.

Bir qədər əvvəl ölkədə 50 kq-lıq un kisəsinin qiymətinin 22-23 manatadək bahalaşdığını deyən nazir müavininin sözlərinə görə, qərar qəbul olunan günədək ölkədə çörəyin qiymətinin sabit saxlanması və süni qiymət artımına imkan verməmək üçün Fövqəladə Hallar Nazirliyinin Taxıl Fondunun ehtiyatlarından dəyirmanlara ucuz qiymətə (qiymətlər elə hesablanıb ki, burda əldə edilən unun satış qiyməti 50 kq un üçün 19 manatdan artıq olmasın) taxıl satışına başlanıb. İndi isə bu qərarın qəbul edilməsi nəticəsində ölkəyə gətirildən taxılın qiyməti 18% ucuzlaşacaq: “Məsələn, bu günədək Qazaxıstandan gətirilən taxılın 1 tonu 330 dollara başa gəlirdisə, indi qiymətlər bundan 60 dollar az, yəni 270 dollara düşəcək. İrandan gətirilən taxılın qiyməti isə tonu 290 dollardan 240 dollara düşməlidir”.

Yeri gəlmişkən, taxıla ƏDV-nin ləğv edilməsi ölkə sahibkarlarına başqa ölkələrdən də buğda gətirməyə imkan verir. A.Aslanovun sözlərinə görə, qərarın qəbul olunmasından dərhal sonra bir neçə iri sahibkar Ukraynadan da taxıl gətirməyə hazırlaşdığını bildirib.

Hazırda Azərbaycanda ölkədə təqribən 2 mln. 50 min ton taxıl ehtiyatı var. Bunun 850 min tonu ölkədə tədarük edilib, 1,2 mln. ton taxıl isə idxal edilib. İdxal olunan taxılın 740 min tonu Qazaxıstandan, 200 min tonu İrandan, qalanı isə digər ölkələrdən gətirilib.

Nazir müavini bildirib ki, adı çəkilən qərar ölkəyə gətirilən unu da ucuzlaşdıracaq. Belə ki, indiyədək ölkəyə idxal olunan unun qiyməti 50 kq üçün 19 manat idi, ƏDV-nin ləğvindən sonra bu rəqəmin də müvafiq surətdə (15,6 manatadək) azalacağı gözlənilir. Yanvarın 1-dən etibarən isə Rusiyadan un idxalına başlanacaq: “Rusiya tərəfi bu barədə bizə məlumat verib”.

Gələn il də taxılla bağlı problem olmamalıdır - çünki bu il Azərbaycanda 900 min hektar ərazidə taxıl əkilib ki, nəticədə 2,4-2,5 mln. ton taxıl, o cümlədən 1,6 mln. ton buğdanın tədarükü gözlənilir.

Qeyd edək ki, Azərbaycanın taxıla olan aylıq tələbatı 135 min tondur.