Aqrar-sənaye kompleksi

Ana səhifə

Azərbaycanda un ucuzlaşıb

17 dekabr 2010 15:19 (UTC +04:00)

“APA-Economics”in xəbərinə görə, Bakının topdansatış mağazaları və dəyirmanlarından unun bir kisəsinin (50 kq) qiymətinin 23-24 manatdan 20 manata, bəzən hətta 19,95 manata düşdüyünü təsdiqləyiblər.

Hazırda unun bir kisəsi 19,95 manata satılır. Dəyirmanlarda ucuzlaşmanın səbəbini Nazirlər Kabinetinin qərarı ilə idxal olunan taxıl və unun ƏDV-dən azad edilməsi və Fövqəladə Hallar Nazirliyinin ehtiyatlarının satışa çıxarılması ilə izah edirlər.

Yeri gəlmişkən, bir qədər əvvəl Azərbaycanda un və çörəyin qiyməti ətrafında yaranan ajiotajda taxıl dəllallarının da rolu olub. Bu barədə “APA-Economics”ə ölkənin şimal regionlarını və Bakını unla təmin edən «Dəvəçi Dəyirman» MMC-nin direktoru Nazim Ağayev bildirib. N.Ağayevin sözlərinə görə, bir qədər əvvəl baş vermiş un qıtlığı və qiymətlərin 23-24 manata çatdığı vaxt şirkət əməkdaşları və dilerləri bunun səbəbini araşdırıb. Məlum olub ki, ayrı-ayrı rayonlarda nisbətən imkanlı şəxslər unun bundan sonra da bahalaşacağını güman edərək, sonradan daha yüksək qiymətə satmaq üçün rayondakı topdansatış məntəqələrindən iri partiyalarla un alıblar: “Özü də bunların arasında tamamilə başqa peşələrin sahibləri, məsələn, həkimlər də olub. Bunlar 500-1000 kisə un alaraq evdə və anbarlarda saxlayıblar. Qiymətlərin bundan sonra da qalxacağını, hətta 30 manata çatacağını gözləyən müvəqqəti dəllallar bu yolla müəyyən gəlir götürməyə ümid edirmişlər. İndi isə qiymətlərin 20 manata düşməsi nəticəsində onlar bu unu dəyər-dəyməzinə satmağa çalışırlar”.