Aqrar-sənaye kompleksi

Ana səhifə

Azərbaycanın qərb rayonlarında aparılan taxıl səpini başa çatıb

21 dekabr 2010 09:19 (UTC +04:00)

Samux. Ayxan Hüseynov - APA. Azərbaycanın Samux, Daşkəsən, Göygöl və Goranboy rayonlarında aparılan taxıl səpini başa çatıb.

Samux rayon Ərazi Kənd Təsərrüfatı İdarəsinin rəisi Ziyad Abbasovun APA-nın Qərb bürosuna verdiyi məlumata görə, bu il Gəncə ətrafı rayonlarda təxminən 53 min hektar ərazidə taxıl səpini aparılıb.

Ötən il 55 min hektar ərazidə taxıl əkilsə də, havaların qeyri-sabit keçməsi səbəbindən bu ərazidən cəmi 120 min ton taxıl yığılıb ki, bu ötən illərə nisbətən 60 min ton az olub.

Fermerlər ötən ilki uğursuzluqlara baxmayaraq, yazda torpaqdan bol məhsul götürəcəklərinə ümid edirlər. Ötən il əkin dövründə yağan güclü yağışlar kənd təsərrüfatı ilə məşğul olan şəxslərin əməyini əlində qoysa da, bu, əhalinin taxıl əkininə olan marağını azaltmayıb. Taxıl əkini ilə məşğul olan fermerlərin sözlərinə görə, bu mövsüm əkinə ziyan verə biləcək neqativ hallardan biri havaların quraq keçməsidir. Bu gedişlə yaz aylarında dağlarda qar qatının olmaması nəticə etibarilə əkin sahələrini suya həsrət qoya bilər. Üstəlik, hazırda müşahidə olunan dekabr ayı üçün xarakterik olmayan isti hava əkin sahələrində ziyanvericilərin artmasına şərait yaradıb.