Aqrar-sənaye kompleksi

Ana səhifə

Azərbaycanda «Aqrolizinq»in xətti ilə texnika satışı asanlaşdırılıb

07 yanvar 2011 10:13 (UTC +04:00)

Bakı. Əli Əhmədov – APA-Economics. Azərbayanda «Aqrolizinq» ASC-nn xətti ilə fermerlərə kənd təsərrüfatı texnikası və texnoloji avadanlıqların lizinqə verilməsi və satılması qaydaları yüngülləşdirilib. «APA-Economics»in məlumatına görə, «Aqrolizinq»ə məxsus kənd təsərrüfatı texnikasının lizinqə verilməsini və lizinq yolu ilə satılmasını sürətləndirmək məqsədi ilə Nazirlər Kabinetinin qərarı ilə ASC-dən lizinq yolu ilə texnika alınarkən ödənilən ilkin məbləğ 10%-ə endirilib.

Xatırladaq ki, indiyədək qüvvədə olan qaydalara əsasən, «Aqrolizinq» ASC-dən texnika alınanda dəyəri 40 min manatadək olan texnika üçün 20%, dəyəri 40 min manatdan yüksək olan texnika üçün isə 10% ilkin məbləğ ödənilib.

«Aqrolizinq»dən bildirilib ki, bu dəyişikliklər fermerlərin ASC-dən kənd təsərrüfatı texnikası almalarını asanlaşdıracaq. «Aqrolizinq»in texnika və texnoloji avadanlıqların tədarükü və təminatı şöbəsinin müdiri Rövşən Əsgərov bildirib ki, hazırda ASC-nin xətti ilə satılan texnikanın 90%-dən çoxunun dəyəri 40 min manatdan aşağıdır. Bura bütün növ traktorlar, kotanlar, kultivatorlar, malalar, taxıl və gübrəsəpənlər və s. aiddir: «Buna görə də ilkin ödənişin azaldılması alıcıların əksəriyyətinə müsbət təsir edəcək. Bu həm də satışın artmasına səbəb olacaq».

Qeyd edək ki, «Aqrolizinq» ASC Kənd Təsərrüfatı Nazirliyinin nəzdində fəaliyyət göstərir. ASC-nin əsas funksiyaları kənd təsərrüfatı məhsulları istehsalçılarının maddi-texniki bazasını möhkəmləndirmək, onlara aqrotexniki xidmətlər göstərməkdən ibarətdir. Bu məqsədlə ASC kənd təsərrüfatı ilə məşğul olan hüquqi və fiziki şəxslərə kənd təsərrüfatı texnikası, texnolojı avadanlıq, ehtiyat hissələri, mineral gübrələr, xəstəlik və ziyanvericilərə qarşı mübarizə preparatları, tinglər, yüksək reproduksiyalı buğda toxumu və damazlıq heyvanların güzəştli şərtlərlə satışını həyata keçirir.