Aqrar-sənaye kompleksi

Ana səhifə

Azərbaycan zeytun ixrac etmək niyyətindədir

07 yanvar 2011 16:04 (UTC +04:00)

Bakı. Nicat Mustafayev - APA-Economics. Azərbaycan sovet dövründə əkilmiş ağaclardan fərqli olan zeytun ağaclarının əkininə başlayıb.

«APA-Economics»in məlumatına görə, Zirə qəsəbəsində zeytun bağı salan və bu məqsədlə Azərbaycan İqtisadi İnkişaf Nazirliyinin Sahibkarlığa Kömək Milli Fondundan (SKMF) güzəştli kredit alan «Proqress» MMC Bursa şəhərindən (Türkiyə) yeni növ zeytun tingləri gətirib. Ümumiyyətlə, Zirədə salınacaq 200 hektar sahədə zeytun bağı üçün 100 min ədəd xüsusi zeytun tingləri gətiriləcək ki, tinglərin bir hissəsi artıq gətirilib və əkin işlərinə başlanılıb.

Sovet dövründə ölkə ərazisində əkilən zeytundan fərqli olaraq Türkiyədən gətirilmiş ağaclar 5 il deyil 3 ildən sonra məhsul verir və hər 4 kq zeytundan 1 kq yağ alınır. Sözügedən zeytun ağaclarının hər biri ildə 10-20 kq yaxın məhsul verə bilir. Göründüyü kimi, Zirədəki 200 hektar ərazidə 100 min tingdən təxminən 1 000-2 000 ton məhsul götürüləcəyi gözlənilir. Zeytun ağacının 400 il ömrü olduğunu nəzərə alsaq, 20-30 ildən sonra məhsuldarlıq bir qədər də artacağı istisna deyil.

Müəssisənin nümayəndələrinin sözlərinə görə, hazırda Azərbaycanda bu məhsula olan maraq bir o qədər də çox deyil. Ümumiyyətlə isə, müəssisə əkin işlərini tam başa çatdıqdan sonra məhsulu həmçinin ixrac etmək niyyətindədir.

Qeyd edək ki, SKMF tərəfindən «Proqress» MMC-yə Zirədə zeytun bağının salınması məqsədilə 400 min manat güzəştli kredit ayrılıb.