Aqrar-sənaye kompleksi

Ana səhifə

Azərbaycan ötən il ət, süd və yun istehsalını artırıb

19 yanvar 2011 12:44 (UTC +04:00)

Bakı. Nicat Mustafayev – APA-Economics. Ötən il ərzində Azərbaycanda diri çəkidə 440 min ton ət, 1 529,2 min ton süd, 1 178,6 mln. ədəd yumurta və 15,6 min ton yun istehsal edilib.

Dövlət Statistika Komitəsindən «APA-Economics»ə verilən məlumata görə, ət istehsalı 2009-cu illə müqayisədə 7,1%, süd istehsalı 6,7%, yun istehsalı 2,4% artıb, yumurta istehsalı isə bəzi quşçuluq fabriklərinin fəaliyyətlərinin dayanması və yaxud zəifləməsi hesabına 2,5% azalıb.

Bu ilin yanvarın 1-nə mövcud inək və camışlardan orta süd sağımı 1 188 kq-a bərabər olub.

Mal-qaranın baş sayı ilbəil dinamik artaraq 2011-ci il yanvarın 1-i vəziyyətinə ölkə üzrə 2 637,4 min baş iri buynuzlu, 8 463,1 min baş qoyun və keçi mövcud olub. Gtən il yanvarın 1-nə nisbətən iri buynuzlu mal-qaranın sayı 1%, qoyun və keçilərin sayı isə 0,6% artıb. İri buynuzlu mal-qaranın 48,3%-ni inək və camışlar təşkil edib.

Qeyd edək ki, 2010-cu ildə ölkənin meşəçilik təsərrüfatlarında istehsal edilmiş mal və xidmətlərin faktiki qiymətlərlə dəyəri 2 042,8 min manat olub. Balıqçılıqla məşğul olan təsərrüfatlar tərəfindən isə 201,6 min manat dəyərində balıq ovlanıb.