Aqrar-sənaye kompleksi

Ana səhifə

Ədalət Muradov: «Azərbaycan hökumətinin ƏDV-dən azad edilən idxal mallarının siyahısının genişləndirilməsi qərarı qeyri-neft sektorunun inkişafına əlavə dəstək verəcək»

27 yanvar 2011 09:21 (UTC +04:00)

Bunu «APA-Economics»ə açıqlamasında İqtisadi İnkişaf Nazirliyi iqtisadi siyasət, təhlil və proqnozlaşdırma şöbəsinin müdiri Ədalət Muradov bildirib.

Onun sözlərinə görə, bəzi mal və avadanlıqların idxalda ƏDV-dən azad olunması təcrübəsi əvvəllər də olub. Lakin yeni imzalanmış qərarla bu siyahı əhəmiyyətli dərəcədə genişləndirilib: «Qərarın mahiyyəti ondan ibarətdir ki, dövlət istehsal təyinatlı bir sıra mal və avadanlıqların idxalına heç bir vergi və rüsum tətbiq etmir, onların idxalını asanlaşdırmaqla qeyri-neft sektorunda istehsal yönümlü layihələri təşviq edir və onların həyata keçirilməsi prosesini sürətləndirir».

Ə.Muradov onu da bildirib ki, bu qərar kənd təsərrüfatı və yeyinti sənayesində istifadə olunan istehsal təyinatlı mal və avadanlıqların böyük əksəriyətini əhatə edir: «Misal üçün damazlıq təsərrüfatları üçün iri və xırdabuynuzlu heyvanlar və cücələri, yem bitkilərinin toxumlarını, gübrələri, qida sənayesində istifadə edilən su təmizləyici avadanlıqları, suvarma qurğularını, traktor qoşqularını, torpağın hazırlanması və işlənməsi üçün maşınları, süd emalı avadanlıqlarını, inkubatorları, ət və quş emalı, çörək-bulka və makaron məmulıatlarının hazırlanması üçün avadanlıqları və s. göstərmək olar».

Nazirliyin şöbə müdirinin sözlərinə görə, qeyd olunan qərarla müəyyən olunmuş mal və avadanlıqlar idxal edilərkən 18%-lik ƏDV və gömrük rüsumunun ödənilməməsi sahibkarlar üçün dövriyyə vəsaitinin çatışmazlığı probleminin əhəmiyyətli dərəcədə həlli kimi qiymətləndirilə bilər: «Eyni zamanda, ödəmələrdən azadolma tədbirləri sahibkarlar tərəfindən mövcud maliyyə imkanları çərçivəsində daha çox istehsal təyinatlı mal və avadanlıqların alınmasına kömək edəcək».

Ə.Muradovun sözlərinə görə, avadanlıqlara xərclənən vəsaitə qənaət olunması istehsal yönümlü investisiya layihələrinin dəyərinin təqribən 10% azalmasına, beləliklə bu layihələr çərçivəsində istehsal olunan malların maya dəyərinin aşağı düşməsinə və rəqabətqabiliyyətliliyinin artmasına səbəb olacaq: «Cari ilin martın 1-dən qüvvəyə minəcək bu tədbirlər kənd təsərrüfatında və yeyniti sənayesində müasir avadanlıq və yeni texnologiyaların tətbiqinə, texnika ilə təchizat səviyyəsinin daha da yaxşılaşdırılmasına, əhalinin keyfiyyətli ərzaq məhsulları ilə daha etibarlı təminatına, qeyri-neft ixracının genişlənməsinə əlverişli şərait yaradacaq».