Aqrar-sənaye kompleksi

Ana səhifə

Bakıda «Kənd təsərrüfatı kreditlərinin sığortalanması mexanizmi»nin təqdimatını keçirilib

25 fevral 2011 09:15 (UTC +04:00)

Tədbirdə çıxış edən AMA-nın icraçı direktoru Jalə Hacıyeva bildirib ki, əsas məqsəd mexanizmlə bağlı aidiyyatı nazirliklərdən yekun hesabata ünvanlanmış rəylərin nəticəsini təqdim etməkdir.

J.Hacıyeva bildirib ki, AMA tərəfindən aparılan tədqiqatın nəticələrinə əsasən, Avropada aqrar sahəyə kredit qoyuluşları üzrə risklərin azaldılması üçün Kreditlərin Sığortalanması Fondu, əksər hallarda Kreditlər üçün Zəmanət Fondu yaradılır.

AMA-nın İdarə Heyətinin sədri Süleyman Kələşovun sözlərinə görə, kənd təsərrüfatı sektoru riskli hesab olunur, təbiətdən asılı olan bu sahənin kreditləşməsini həyata keçirməkdə sığortanın rolu çox vacibdir. Lakin ölkədə fəaliyyət göstərən bank kredit təşkilatları kənd təsərrüfatının kreditləşməsinə o qədər də maraq göstərmir. «Ötən il Azərbaycanda ümumi kredit qoyuluşlarının həcmi 9,1 mlrd. manat təşkil edib ki, bunun da 338 mln. manatı və ya 3,7%-i kənd təsərrüfatı sektorunun payına düşüb. Bu rəqəm isə sahənin inkişafı üçün olduqca azdır», - deyə S.Kələşov bildirib.

S.Kələşovun sözlərinə görə, kənd təsərrüfatının inkişaf etdirilməsi sosial xarakterli bir məsələ olmasa da, sistematik risklərin mövcudluğu ölkə bazarında bu məhsullara olan tələblə təklif arasında qeyri-tarazlıq yaradır və bu makroiqtisadi meyarlar üçün təzadların genişlənməsinə imkan verir. «İqtisadiyyatın diversifikasiyası və əhalinin ərzaq məhsulları ilə etibarlı təminatına dair dövlət proqramına dəstəyin tərkib hissəsi olaraq sığorta fondunun yaradılması vacib elementlərdən biridir», - deyə AMA rəsmisi vurğulayıb.

Tədbirdə daha sonra AMA-nın tədqiqat qrupunun rəhbəri Vaqif Rüstəmov rəylər ilə əlaqədar fikirlərini bildirib. V.Rüstəmov ilk olaraq sığorta fondunun yaradılması üçün müvafiq hüquqi bazasının formaaşdırılmasının vacibliyini bildirib. Mexanizmin təkmilləşdirilməsi üçün Maliyyə və Kənd Təsərrüfatı nazirlikləri tərəfindən yaradılan işçi qrupuna dəstəyin verilməsi zəruridir.

Təqdimatda İqtisadi İnkişaf Nazirliyi, Maliyyə Nazirliyi, Azərbaycan Mərkəzi Bankı, «Azərsığorta» Dövlət Sığorta Kommersiya Şirkəti tərəfindən yeni mexanizmlə bağlı rəy və təklifləri dinlənilib.