Aqrar-sənaye kompleksi

Ana səhifə

Bu gündən dünyada qara kürünün ixracı qadağan olunur

01 mart 2011 14:50 (UTC +04:00)

“APA-Economics”in xəbərinə görə, dünyada nərə balığının ovu ilə məşğul olan ölkələrdən heç biri bu sahədə icazələr verən CITES (The Convention on International Trade in Endangered Species of Wild Fauna and Flora) təşkilatına kvotanın müddətinin uzadılması ilə bağlı müraciət etməyiblər.

Nəticədə bu gün təşkilat kvotaları «sıfır» həddində təsdiqləyib. Doğrudur, CITES-in özündə bildirirlər ki, qara kürünün iri istehsalçıları olan Xəzər dənizi ölkələri hələ il ərzində buna görə müraciət edə bilərlər və bu müraciət əsasında yeni kvotanın həcmi müəyyənləşdirilə bilər, amma buna da vaxt tələb olunacaq. Hərçənd ixracatçı ölkələrdən heç biri bunu etməyə tələsmir. Yeri gəlmişkən, ötən il nərə balıqlarının ovu üçün 81 ton kvota ayrılsa da, ölkələr praktiki olaraq bundan istifadə etməyib.

Azərbaycan Ekologiya və Təbii Sərvətlər Nazirliyindən “APA-Economics”ə nərə balığı və qara kürünün ixracı ilə bağlı kvotanın müddətinin başa çatmasını təsdiqləyiblər. Nazirliyin Su hövzələrində bioresursların artırılması və mühafizəsi departamenti rəisinin müşaviri Tariyel Məmmədli bildirib ki, kvotanın uzadılmaması bir neçə səbəblə bağlıdır: “Əvvəla, indi xaricə qara kürü ixrac etmək iqtisadi cəhətdən sərfəli deyil. 2-3 il əvvəl Avropada qiymətlər bizdəkindən 8-10 dəfə baha idi - orda 3-5 min, bizdə isə təqribən 500 dollar, indi isə bu qiymətlər demək olar ki, bərabərləşib».

Qeyd edək ki, Avropada qara kürüyə ehtiyacı ödəmək üçün nərə balıqlarının akvakultura (süni balıq artırma) yolu ilə artırılması və ondan qara kürü alınması geniş yayılıb, nəticədə indi qitədə qara kürünün kiloqramı 1000 avroya satılır. Bu səbəbdən Azərbaycan tərəfi ötən ilki 70 tona yaxın nərə balığı ovlamaq kvotasından istifadə etməyib.

Bundan başqa, ötən ilin sonunda Xəzəryanı ölkələrin dövlət başçılarının Bakı sammitində Xəzərdə nərə balıqlarının azalmasının qarşısının alınması üçün nərə balıqlarının ovlanmasına moratorium təklif olunub. Bu üzdən ölkələr nərə balığı ovu üçün kvotanı artırmayıblar. “Daxili tələbatın ödənilməsinə gəlincə, bunu süni balıqartırma yolu ilə təmin etmək olar” - deyən T.Məmmədlinin sözlərinə görə, moratorium 2016-cı ilədək davam edəcək.