Aqrar-sənaye kompleksi

Ana səhifə

Azərbaycanda kənd təsərrüfatı məhsullarının istehsalçı qiymətləri son bir ildə 14% bahalaşıb

23 mart 2011 09:58 (UTC +04:00)

Bakı. Nicat Mustafayev - APA-Economics. Bu ilin fevral ayında Azərbaycanda bitkiçilik və heyvandarlıq məhsullarının istehsalçı qiymətləri əvvəlki aya nisbətən 2,5%, yanvar-fevral aylarında isə 2010-cu ilin müvafiq dövrünə nisbətən 13,6% bahalaşıb.

Dövlət Statistika Komitəsindən «APA-Economics»ə verilən məlumata görə, 2011-ci ilin fevral ayında birillik bitkilər üzrə qiymət indeksi əvvəlki aya nisbətən 101,1% təşkil edib. Bu bölmədə dənli bitkilər, paxlalı bitkilər və yağlı toxumların istehsalçı qiymətləri 1,6% ucuzlaşıb, tərəvəz, bostan məhsulları, kökümeyvəli və köküyumrulular 3,1%, tərkibində yüksək miqdarda nişasta olan süfrə kökümeyvəlilər və köküyumruluların qiymətləri isə 8,1% bahalaşıb.

Eyni zamanda çoxillik bitkilərdən tropik və subtropik meyvələrin istehsalçı qiymətləri 0,8%, sitrus meyvələrin 3%, tumlu və çəyirdəkli meyvələrin 8,1%, sair meyvə ağacları, kol meyvələri və qoz-fındığın qiymətləri 7,6% bahalaşıb.

Heyvandarlıq bölməsində iri-buynuzlu mal-qara və onların məhsullarının istehsalçı qiymətləri 0,9%, qoyun və keçilər, onların çiy südü və yununun 1,4%, diri ev quşları və onların yumurtalarının istehsalçı qiyməti isə 15% bahalaşıb.

Qeyd edək ki, ay ərzində meşə təsərrüfatı məhsullarının istehsalçı qiymətlərində heç bir dəyişiklik müşahidə olunmayıb. Balıq və sair balıqçılıq məhsullarının istehsalçı qiymətləri isə 1,1% ucuzlaşıb.