Aqrar-sənaye kompleksi

Ana səhifə

Tacikistan pambıq ixracına rüsum tətbiq edəcək

06 aprel 2011 10:57 (UTC +04:00)

Bakı - APA-Economics. Tacikistan hökuməti ölkədən pambıq ixracına müvəqqəti dövlət rüsumları tətbiq etmək qərarına gəlib. “APA-Economics”in “AsiaPlus”a( http://news.tj/) istinadən xəbərinə görə, bu barədə Tacikistan Kənd Təsərrüfatı Nazirliyindən bildirilib.

Bu addıma səbəb hazırda xammal çatışmazlığından əziyyət çəkən yerli pambıq lifi istehsalçısını qorumaqdır. Tacikistan Sənaye və Energetika Nazirliyinin irəli sürdüyü bu təklifi prezident Emoməli Rəhmon bəyənib. Hazırda hökumətin işçi qrupu pambığın ixrac rüsumlarını müəyyənləşdirmək istiqamətində çalışır və gələn ay öz təkliflərini açıqlayacaq.

Məhsullarını Liverpul pambıq birjasında satan Tacikistanın Sənaye və Energetika Nazirliyi bu il dünya bazarında pambığın qiymətinin artacağını proqnozlaşdırır. Ötən il 1 tonu 1700 dollara olan “ağ qızıl”ın qiyməti indi 1 tona görə 5 min dollar təşkil edir.

Tacikistanın pambıq emalı müəssisələrinin illik istehsal gücü 70 min tondur. Təkcə bu ilin yanvar-fevral ayları ərzində ölkə 68 mln. 859 min dollar dəyəri olan 17 865 ton pambıq ixrac edib.