Aqrar-sənaye kompleksi

Ana səhifə

Azərbaycanda kənd təsərrüfatı istehsalı I rübdə 5% artıb

15 aprel 2011 13:53 (UTC +04:00)

Bakı. Nicat Mustafayev – APA-Economics. Bu ilin I rübü ərzində Azərbaycanda kənd təsərrüfatının ümumi məhsulu ötən ilin analoji dövrü ilə müqayisədə 5,3%, o cümlədən bitkiçilik məhsulları istehsalı 6,6%, heyvandarlıq məhsulları istehsalı isə 5,3% artıb.

Dövlət Statistika Komitəsindən «APA-Economics»ə verilən məlumata görə, aprel ayının 1-dək 110,6 min hektar sahədə yazlıq bitkilərin səpini aparılıb. Bu dövrdə 8,4 min hektar sahədə dənli və dənli paxlalı bitkilər (qarğıdalısız), 1,5 min hektar sahədə dən üçün qarğıdalı, 29,4 min hektar sahədə kartof, 24,8 min hektar sahədə tərəvəz, 842 hektar sahədə pambıq, 4,4 min hektar sahədə bostan bitkiləri, 1,7 min hektar sahədə dən üçün günəbaxan, 1,5 min hektar sahədə şəkər çuğunduru, 37,3 min hektar sahədə çoxillik otlar əkilib.

«Hesabat dövründə heyvandarlıq sahəsində də müəyyən artım qeydə alınıb. Belə ki, keçən ilin müvafiq dövrü ilə müqayisədə I rübdə iri buynuzlu mal-qaranın baş sayı 1,2% çoxalaraq 2,650 mln., qoyun və keçilərin sayı 0,5% artaraq 8 641,5 min başa çatıb. Bu dövrdə diri çəkidə ət istehsalı 5,6% artaraq 99,6 min ton, süd istehsalı 9,3% artaraq 363,7 min ton, yumurta istehsalı isə 13,3% azalaraq 258,3 mln. ədəd olub», - deyə Komitədən bildirilib.

Qeyd edək ki, ilin əvvəlindən tarlalardan 8,4 min ton və ya keçən ildəkindən 16% çox tərəvəz toplanıb.