Aqrar-sənaye kompleksi

Ana səhifə

Azərbaycanın kənd təsərrüfatı məhsulları Çexiya vasitəsilə Avropa Birliyinə ixrac olunacaq

18 may 2011 11:27 (UTC +04:00)

Bakı. Əli Əhmədov - APA-Economics. Azərbaycanla Çexiya arasında standartlaşdırma və metrologiya sahəsində əməkdaşlıq Azərbaycanda istehsal olunan malların, o cümlədən kənd təsərrüfatı məhsullarının Avropa Birliyi ölkələrinə nəqlinə imkan verəcək.

«APA-Economics»in məlumatına görə, bu barədə Çexiyanın Texniki Standartlaşdırma, Metrologiya və Dövlət Sınaqları üzrə İdarəsinin rəhbəri ilə görüşdə Azərbaycan Standartlaşdırma, Metrologiya və Patent üzrə Dövlət Komitəsinin sədri Ramiz Həsənov bildirib.

Azərbaycan və Çexiyanın bu sahədə fəaliyyət göstərən qurumları arasında əməkdaşlıq barədə memorandum mayın 17-də Çexiya prezidentinin Azərbaycana səfəri çərçivəsində imzalanıb. Ramiz Həsənovun sözlərinə görə, bu sənəd tərəflər arasında təcrübə və ekspert mübadiləsinə, mütəxəssislərin təliminə və s. işlərə imkan verir: «Bu işlər nəticəsində Avropada Azərbaycan standartlarını qəbul edəcəkləri təqdirdə, bizim şirkətlərin istehsal etdiyi malları Avropa ölkələrinə göndərmək mümkün olacaq. Eyni zamanda hələlik Azərbaycan standartlarını Avropa ölkələri tanımasa da, Azərbaycan Çexiya vasitəsilə öz məhsullarını sertifikatlaşdırıb xaricə ixrac edə biləcək. Burda söhbət əsasən kənd təsərrüfatı və ərzaq məhsullarından gedir ».

Komitə sədri bildirib ki, Çexiya nümayəndələri komitənin sınaq laboratoriyasının işindən razı qalıblar: «Çox yüksək, Avropa standartlarının tələblərinə cavab verən laboratoriyadır, burda işləyən mütəxəssislər də Avropa ölkələrində təlim keçiblər». Qonaqlar komitənin metrologiya laboratoriyası və Sumqayıtdakı neft-qaz laboratoriyasının işi ilə də tanış olacaqlar.