Aqrar-sənaye kompleksi

Ana səhifə

Ağdamda fermerlər güzəştli şərtlərlə gübrə ala bilmirlər

24 may 2011 13:28 (UTC +04:00)

Ağdam. Teymur Zahidoğlu - APA. Ağdamın Zəngişallı və Mahrızlı kəndlərində kənd təsərrüfatı ilə məşğul olan fermerlər dövlət tərəfindən güzəştli şərtlərlə verilən gübrələri ala bilmirlər. Bu barədə APA-nın Qarabağ bürosuna fermerlərin özləri məlumat veriblər.

Onların sözlərinə görə, təxminən 20 gündən sonra taxıl sahələrində biçinə start veriləcək. Amma onlar indiyədək məhsul altında olan sahələrə verməli olduqları gübrə və digər preparatları ala bilməyiblər.

Bundan başqa, fermerlər deyirlər ki, bir kisəsi 7-8 manat dəyərində olan gübrə növləri bitkiçilik və başqa ticarət məntəqələrində 15 manata satılır. Bir hektar sahəyə isə təxminən 250 kq mineral gübrə vermək lazımdır. Kəndlilər bunu öz maddi imkanları hesabına yerinə yetirməyin mümkünsüz olduğunu deyirlər.

Kənd təsərrüfatı texnikalarının xidmət haqqının da bahalaşdığını deyən fermerlərə görə, hazırda bir hektar torpağın əkilməsi 40 manat, malalanıb səpinə hazırlanması 100 manat, dənli bitkilərin biçini 50 manat, təxminən 500 metrdən yaxın məsafəyə daşınması isə hər bir reys üçün 12 manat təşkil edir.

Sakinlər bildirirlər ki, 2001-ci ildən bu yana bir dəfə də olsun, aqrolizinq xidmətlərindən istifadə edə bilməyiblər. Ona görə bəzən əkin altında olan sahələrə vaxtlı-vaxtında aqrotexniki xidmət göstərilmədiyindən məhsuldarlıq ya həddindən aşağı düşür, ya da ümumiyyətlə, məhsul götürmək mümkün olmur. Kənd təsərrüfatı texnikalarında xidmətin bahalığı isə məhsulun maya dəyərinin artmasına gətirib çıxarır.

Ağdam rayon İcra Hakimiyyətindən APA-nın Qarabağ bürosuna bildirilib ki, həqiqətən də kəndlilərin dediyi kimi, bu il onlara güzəştli şəkildə gübrələrin verilməsi ləngiyib. Bununla bağlı Ağdam RİH “Aqrolizinq” ASC-yə müraciət edib. Qarşı tərəf isə problemin ən qısa müddət ərzində aradan qaldırılacağını bildirib.

ASC-nin Ağdam “Aqroservis” filialından isə bürosuna bildirilib ki, rayonun işğal olunmamış yaşayış məntəqələrində istənilən fermerin müraciətinə əsasən onlara texniki xidmət göstərilir. Sözügedən kəndlərdə səslənən şikayətlərə gəlincə, filialın direktoru Elman Abdullayev deyir ki, həmin yaşayış məntəqələrində çoxlu sayda şəxsə müqavilə əsasında aqrotexniki xidmət göstərilib: “Gübrələrin verilməsində məsələ o qədər də kritik deyil. Düzdür, taxıl üçün gübrələrin verilməsi gecikmiş hesab olunsa da, bostan-tərəvəz məhsulları üçün bundan sonra gübrə verilməsi əlverişlidir. Həmin kəndlər isə xüsusilə kənd təsərrüfatında bostan və tərəvəzçiliklə məşğul olurlar”.