Aqrar-sənaye kompleksi

Ana səhifə

Kənd təsərrüfatı naziri Bərdə və Tərtər rayonlarında olub

25 may 2011 15:55 (UTC +04:00)

“Mən kənd təsərrüfatı naziri olaraq hamıya xaricdən gətirilən meyvə tərəvəzi deyil, Azərbaycanda istehsal olunan yerli malları almağı məsləhət görürəm”

Bərdə. Teymur Zahidoğlu - APA. Kənd təsərrüfatı naziri İsmət Abasov bu gün Bərdə və Tərtər rayonlarında səfərdə olub. APA-nın Qarabağ bürosunun məlumatına görə, nazir sözügedən rayonlarda taxılçılıq üzrə yeni yaradılmış toxumların səpildiyi sahələrlə tanış olub, məhsul verməkdə olan zəmilərin mövcud vəziyyəti ilə yaxından maraqlanıb.

Daha sonra isə İ.Abasov Tərtər rayonu ərazisində taxılçılıq üzrə Bölgə Təcrübə Stansiyasında respublikanın 10-a yaxın kənd rayonundan olan toxum müfəttişləri, bitki mühafizə stansiyalarının rəisləri və taxıl toxumçuluğu ilə məşğul olan fermerlərlə görüşüb.

Nazir bölgəyə səfəri çərçivəsində “Suvarılan şəraitdə dənli bitkilərin yeni sortlarının yaradılması və toxumçuluğun təşkili”nə dair ümumrespublika tarla seminar müşavirəsi keçirib. Tədbirdə kənd təsərrüfatının müxtəlif sahələrində fəaliyyət göstərən fermerlərlə və mütəxəssislərlə əkinçilik, çəmənçilik, otlaqlar, pambıqçılıq və heyvandarlıq məsələləri müzakirə olunub.

Jurnalistlərin suallarını cavablandıran İsmət Abasov kənd təsərrüfatı sahəsində mövcud olan problemlərdən söz açıb. Əsas çətinliklərdən biri kimi ölkədə gübrənin vaxtında fermerlərə çatdırılmadığını və ya onun normativ əsasında torpağa verilmədiyini deyən nazir bildirib ki, “Aqroservis”lərdən vaxtında gübrə ala bilməyən fermerlərə bu istiqamət üzrə fəaliyyət göstərən özəl şirkətlər gübrəni baha qiymətə sata bilməzlər. Çünki Nazirlər Kabinetinin qərarına görə ölkəyə satış məqsədi ilə gübrə gətirən bütün hüquqi və fiziki şəxslər bu növ məhsulu yalnız güzəştli qiymətlərlə sata bilər.

Kənd təsərrüfatı kadrlarının çatışmazlığına dair sualı cavablandıran İ. Abbasov deyib ki, həqiqətən SSRİ dağıldıqdan sonra 1990-cı illərin əvvəllərində kənd təsərrüfatı sahəsi acınacaqlı vəziyyətə salınıb: “Ancaq bu sahənin inkişafına start verildikdən sonra ölkə başçısının göstərişi ilə kənd təsərrüfatı kadrlarının hazırlanması üçün Aqrar Universitet yaradılıb və hazırda həmin təhsil ocağının xeyli sayda məzunu ixtisasları üzrə yerləşdirilir”.

Respublikanın ayrı-ayrı rayonlarında qeydə alınan quduzluq xəstəliyi faktına gəlincə, kənd təsərrüfatı naziri bunu kütləvi xəstəlik kimi qələmə verməyin düzgün olmadığını bildirib: “Bu cür halların artmasına səbəb işğal altında olan ərazilərdən axışıb gələn vəhşi çöl heyvanlarının sayının sürətlə artmasıdır. Hazırda həmin ərazilərdə yaşayan və sürətlə artan heyvanlar nəzarətdən kənardadır və ermənilərin nəzarətində olan ərazilərdə törədilən yanğınlar həmin canlıların sürətlə yaşayış yerini dəyişib həyat olan məntəqələrə soxulmasına gətirib çıxarır. Buna görə də dinc sakinlərin yaşadığı ərazilərə gələn heyvanlar təbii ki, özləri ilə bir çox yoluxucu xəstəliklər gətirir ki, bunlardan da ən təhlükəlisi və geniş yayılanı quduzluq xəstəliyidir. Bu problemin aradan qaldırılması bütün əlaqədar qurumların birgə iş aparmasından asılıdır”.

İ.Abasov vaxtaşırı keçirilən kənd təsərrüfatı yarmarkalarında xaricdən gətirilən məhsulların yerli malları üstələməsinə belə münasibət bildirib: “Kənd təsərrüfatı naziri olaraq bütün Azərbaycan xalqına xarici məhsulları deyil, yerli malları almağı məsləhət görürəm. Çünki Azərbaycan istehsalı olan bütün növ meyvə-tərəvəz və bostan bitkiləri ekoloji cəhətdən xarici mallardan keyfiyyətli olur”.