Aqrar-sənaye kompleksi

Ana səhifə

Azərbaycanda yeni fermer təsərrüfatlarının yaradılmasına 2,2 mlrd. dollar xərclənəcək

19 iyul 2011 14:38 (UTC +04:00)

«APA-Economics»in məlumatına görə, bu barədə Dövlət Torpaq və Xəritəçəkmə Komitəsinin sədri Qərib Məmmədov bildirib.

Onun sözlərinə görə, respublikanın müxtəlif ərazilərində yerləşəcək fermer təsərrüfatlarının yaradılması üçün ilkin mərhələdə görüləcək əsas iş torpaqların meliorasiya və irriqasiya sistemlərinin qurulması və bu sahələrin əkin üçün yararlı vəziyyətə gətirilməsidir.

Q.Məmmədov bildirib ki, iri fermer təsərrüfatlarının yaradılması üzrə işlər iki mərhələyə bölünüb. Birinci mərhələ nisbətən ucuz başa gələcək və yararlı vəziyyətə çatdırmaq üçün az vəsait tələb olunan əraziləri - təqribən 43,5 min hektar ərazini əhatə edəcək. Bura Ağcabədi, Salyan və Sabirabad rayonlarındakı ərazilər aiddir. Bu ərazilərdə fermer təsərrüfatlarının 2012-ci ilədək yaradılması gözlənilir.

Torpaqların qalan hissəsində - 168 min hektarlıq ərazidə isə fermer təsərrüfatlarının yaradılması üzrə işlər 2020-ci ilədək davam edəcək. Q.Məmmədovun sözlərinə görə, bu sahələrin əkin üçün əlverişli vəziyyətə gətirilməsi üçün daha böyük vəsaitlər tələb olunur. Belə ki, bu işlər çərçivəsində Aşağı Şirvan kanalının çəkilməsi (70 min hektar sahəni əhatə edəcək), Araz çayının yeni qolu ilə bağlı yeni kanalların çəkilməsi (50 min hektar sahəni əhatə edəcək) nəzərdə tutulur: «Bu torpaqlarda meliorasiya-irriqasiya işləri gedəndən sonra onlar əkinçiliyə təhvil veriləcək».

İlkin hesablamalara görə, torpaqların əlverişli səviyyəyə çatdırılması üçün birinci mərhələdə (43,5 min hektar üçün) 230 mln. dollar, ikinci mərhələdə isə təqribən 2 mlrd. dollar vəsait tələb olunur. Q.Məmmədovun sözlərinə görə, birinci mərhələnin maliyyələşdirilməsi üçün artıq müvafiq beynəlxalq qurumlarla danışıqlar aparılır: «İkinci mərhələ üçün nəzərdə tutulan 2 mlrd. dollarlıq vəsaiti isə yəqin ki, Azərbaycan hökuməti özü ayıracaq».