Aqrar-sənaye kompleksi

Ana səhifə

Azərbaycanın kənd təsərrüfatı naziri Dünya Bankının nümayəndələri ilə görüşüb

27 iyul 2011 11:57 (UTC +04:00)

Bakı. Nicat Mustafayev - APA-Economics. Azərbaycanın kənd təsərrüfatı naziri İsmət Abasov Dünya Bankının (DB) Azərbaycan üzrə ölkə meneceri Cozef Ouen və Azərbaycan Kənd İnvestisiya Layihəsi (AzRIP) üzrə tapşırıq qrupunun rəhbəri Daniel Ouen ilə görüşüb.

Kənd Təsərrüfatı Nazirliyindən «APA-Economics»ə verilən məlumata görə, görüşdə AzRIP-ın ikinci mərhələsinə dair müzakirələr aparılıb.

İ.Abasov Azərbaycan ilə DB arasında əməkdaşlığın genişləndirilməsi üçün Azərbaycanda münbit şəraitin və geniş potensialın olduğunu missiya üzvlərinin nəzərinə çatdırıb. Nazir Azərbaycanda DB-nin layihələrinin dəstəkləndiyini və bu layihələrin həyata keçirilməsi üçün nazirlik tərəfindən bütün şəraitin yaradılmasını qeyd edib. O, kənd təsərrüfatının inkişafında ərzaq bolluğunun yaradılmasında, əhalinin kəndlərdən miqrasiyasının qarşısının alınmasında, ümumiyyətlə kəndlərdə sosial vəziyyətin yaxşılaşdırılmasında belə layihələrin mühüm əhəmiyyət kəsb etdiyini nəzərinə çatdırıb. İ.Abasov icmaların istəyindən asılı olaraq layihə vəsaitinin kəndlərdə infrastrukturun yaxşılaşdırılmasına yönəldilməsini vacib məsələ kimi qiymətləndirib.

Öz növbəsində C.Ouen DB-nın AzRIP-II layihəsinin qiymətləndirmə missiyasının Azərbaycanda iyulun 17-dən 30-dək görüşləri olacağını, problemlərin müəyyənləşdirilib yerində əməli köməklik göstərilməsini və zəruri işlərin həyata keçirilməsini bildirib.

Qeyd edək ki, AzRIP çərçivəsində DB Azərbaycana 21,1 mln. ABŞ dolları ayırıb. Layihəyə Azərbaycanın 21 rayonunun əhatə edir.