Aqrar-sənaye kompleksi

Ana səhifə

Bu il Azərbaycan fermerləri 51,6 mln. manat subsidiya alacaq

29 iyul 2011 13:24 (UTC +04:00)

Bakı. Əli Əhmədov - APA-ECONOMICS. Bu il Azərbaycan fermerləri dövlət büdcəsi hesabına 51,6 mln. manat məbləğində subsidiya alacaq.

Kənd Təsərrüfatı Nazirliyindən «APA-ECONOMICS»ə verilən məlumata görə, bu barədə subsidiyaların verilməsi ilə bağlı Respublika Komissiyası qərar qəbul edib.

Komissiyanın işçi qrupu kənd təsərrüfatı məhsullarının istehsalçılarına subsidiyanın (hər hektar əkin sahəsinin və çoxillik əkmələrin (növündən asılı olmayaraq) becərilməsində sərf olunan yanacaq və motor yağlarına görə 40 manat) verilməsi ilə əlaqədar rayon komissiyalarından daxil olan sənədləri dəqiqləşdirib.

Komissiyanın iclasında 57 rayon (şəhər) komissiyasından daxil olan sənədlərə baxılıb. Sonda ölkənin 381 495 kənd təsərrüfatı məhsullarının istehsalçısına 1 290 883,74 hektar əkin sahəsinin və çoxillik əkmələrin becərilməsində sərf olunan yanacaq və motor yağlarına görə dövlət büdcəsinin vəsaiti hesabına 51 635 349,6 manat məbləğində subsidiya verilməsi barədə qərar qəbul edilib. İstehsalçılara yardımın ödənilməsi məqsədilə müvafiq sənədlər Azərbaycan Maliyyə Nazirliyinə, “Kapital Bank” ASC-yə və aidiyyəti rayon (şəhər) icra hakimiyyətlərinə göndərilib. Nazirlikdən bildirilib ki, yaxın günlərdə kənd təsərrüfatı məhsullarının istehsalçılarına yardımın verilməsi prosesinə başlanacaq.