Aqrar-sənaye kompleksi

Ana səhifə

Azərbaycanda bitkiçilik və heyvandarlıq məhsullarının istehsalçı qiymətləri iyulda 3% ucuzlaşıb

04 avqust 2011 09:44 (UTC +04:00)

Bakı. Nicat Mustafayev – APA-Economics. Bu ilin iyul ayında Azərbaycanda bitkiçilik və heyvandarlıq məhsullarının istehsalçı qiymətləri əvvəlki ayla müqayisədə 3,4% ucuzlaşıb.

Dövlət Statistika Komitəsindən «APA-Economics»ə verilən məlumata görə, birillik bitkilərdən arpanın istehsalçı qiymətləri 1,1%, buğdanın 5,6%, yaşıl paxlalı tərəvəzlərin 25,8%, qabıqdan çıxarılmış, qurudulmuş paxlalı tərəvəzlərin 0,9%, kələmin 1,8%, kartofun 0,2%, soğanın 5,8%, bibərin və pomidorun müvafiq olaraq 28,6% və 13,6%, badımcanın 34%, qarpızın 39,3%, yemişin 12,3%, quru otun istehsalçı qiymətləri 2% ucuzlaşıb, qarğıdalının istehsalçı qiymətləri 2,8%, keşnişin 0,8%, şüyüdün 1,7%, süfrə çuğundurunun 7,7%, xiyarın 4,5%, göy soğanın 0,2%, yoncanın istehsalçı qiymətləri isə 7,5% bahalaşıb.

Çoxillik bitkilərdən üzümün istehsalçı qiymətləri 1,4%, almanın 2,4%, armudun 1,2%, albalının 0,4%, gavalının 2,3%, alçanın istehsalçı qiymətləri isə 2,9% ucuzlaşıb.

«Bu ucuzlaşma ilə yanaşı iyul ayı ərzində çoxillik bitkilərdən limonun istehsalçı qiymətlərində 0,5%, əriyin 1,5%, çiyələyin istehsalçı qiymətlərində isə 2,5% bahalaşma müşahidə olunub», - deyə Komitədən bildirilib.

Diri heyvanlar və heyvandarlıq məhsullarından iri-buynuzlu mal-qaranın istehsalçı qiymətləri 0,5%, inəyin 0,2%, camışın 1,4%, erkək buzovun 0,4%, inək südünün 0,1%, erkək qazın 5,2%, toyuq yumurtalarının istehsalçı qiymətləri 5,9% ucuzlaşıb, 1 yaşdan 2 yaşadək olan dişi dananın istehsalçı qiymətləri 0,8%, ana qoyunun 1,4%, 1 yaşadək quzunun 2,9%, diri keçilərin 1,9%, camış südünün 0,3%, balın istehsalçı qiymətləri isə 0,5% bahalaşıb. İyul ayı ərzində balıq və sair balıqçılıq məhsullarından diri balığın istehsalçı qiymətlərində isə 0,3% bahalaşma müşahidə olunub.