Aqrar-sənaye kompleksi

Ana səhifə

Azərbaycanın aqrar sektorunda illik artım 9%-i ötüb

15 sentyabr 2011 10:02 (UTC +04:00)

Bakı. Əli Əhmədov – APA-Economics. Bu ilin ilk yanvar-avqust aylarında Azərbaycanın aqrar sektorunda artım tempi 9,4% təşkil edib. Bu dövrdə bitkiçilik məhsullarının istehsalı 13,7%, heyvandarlıq məhsullarının istehsalı isə 4,2% artıb.

Dövlət Statistika Komitəsindən «APA-Economics»ə verilən məlumata görə, sentyabrın 1-dək olan dövrdə qarğıdalı da daxil olmaqla 942,5 min hektar sahənin məhsulu toplanıb və həmin sahələrdən 2 348,9 min ton məhsul götürülüb. Ötən ilə nisbətən məhsuldarlıq 4,8 sentner artaraq 24,9 sentner/ha təşkil edib. Yığım başlanandan indiyədək tarlalardan 688,7 min ton, yaxud ötən ilə nisbətən 38 min ton çox kartof, 962 min ton (31,5 min ton çox) tərəvəz, 295,8 min ton (47,7 min ton çox) meyvə və giləmeyvə, 442,1 min ton (66,7 min ton çox) bostan məhsulları, 24 min ton (855 ton çox) üzüm, 2 114,2 ton (343 ton çox) tütün, 398 ton (17,8 ton çox) yaşıl çay yarpağı toplanıb.

İlin əvvəlindən keçən vaxt ərzində diri çəkidə ət istehsalı 4,8% artaraq 285,8 min tona, süd istehsalı 7,7% artaraq 1 70,9 min tona, yumurta istehsalı 16,3% azalaraq 664,5 mln. ədədə, yun istehsalı 5,6% artaraq 14,7 min tona çatıb.