Aqrar-sənaye kompleksi

Ana səhifə

Azərbaycandan ixrac olunan fındıq ekspertizadan keçirilir

22 sentyabr 2011 14:15 (UTC +04:00)

Bakı. Sevil Zeynalqızı-APA. Azərbaycandan xarici ölkələrə ixracı nəzərdə tutulan fındıq məhsulu ekspertizadan keçirilir. Bu haqda APA-ya Kənd Təsərrüfatı Nazirliyi yanında Dövlət Fitosanitar Nəzarəti Xidmətinin Respublika Nəzarət Toksikologiya Laboratoriyasının rəhbəri Yaqub İbrahimov məlumat verib.

Onun sözlərinə görə, ixrac olunan fındığın tərkibindəki oflatoksinin miqdarı yoxlanılır: “Fındıq yaxşı qurudulmadıqda, tərkibi yaş qaldıqda onda göbələk xəstəliyi əmələ gəlir. Bu cür məhsullardan istifadə insanın qaraciyəri və digər orqanlarına mənfi təsir göstərir. Xaricə idxal olunan fındıqların tərkibində pesitidlərin qalıq miqdarı və radiomuklitlər də yoxlanılır. Bütün bu göstəricilər normaya uyğun olduqda sahibkara icazə verilir ki, məhsulu xaricə göndərsin”. 2006-cı ildə İtaliyada Azərbaycandan idxal edilən 430 ton fındığın məhv edildiyini xatırladan Y. İbrahimov qeyd edib ki, o zaman bu məhsullar rəhbərlik etdiyi laboratoriyada yoxlanılmırdı: “Azərbaycan Avropa, MDB dövlətlərinə, Amerika və digər dövlətlərə fındıq ixrac edir. Bütün dövlətlər idxal etdikləri məhsulları laboratoriyalar vasitəsilə yoxlayır. Məqsədimiz odur ki, bizdən ixrac edilən məhsullarda neqativ hallar aşkarlanmasın. Ona görə də Qax, Zaqatala, Balakən və Qəbələdə sahibkarların müraciətlərinə əsasən onların ixrac etməyə hazırlaşdığı bütün məhsullar yoxlanılır”.