Aqrar-sənaye kompleksi

Ana səhifə

Mil-Muğan bölgəsində ətin qiyməti qalxıb - ARAŞDIRMA

Mil-Muğan bölgəsində ətin qiyməti qalxıb - <font color=red>ARAŞDIRMA</font>

22 sentyabr 2011 14:35 (UTC +04:00)

Şirvan. Əlibəy Zeynallı - APA-Economics. Azərbaycanın Mil-Muğan bölgəsində mal ətinin qiyməti 8 manata, qoyun ətinin qiyməti isə 9-10 manata qədər yüksəlib. APA-nın Mil-Muğan bürosunun əməkdaşı ətin bahalaşmasının səbəblərini Salyan, Neftçala, İmişli, Saatlı, Sabirabad, Hacıqabul rayonlarında və Şirvan şəhərində araşdırıb. Problem oxşar olduğundan, bir şəhər üzrə ət satışının təxmini statistikası müəyyən edilib.

Ət biznesi ilə məşğul olan yerli qəssabların dediyinə görə, onlar hər həftə diri mal-qara tədarük etmək üçün ya kəndləri gəzib mal-qara axtarırlar, ya da mal-heyvan bazarlarına üz tuturlar. Adətən kiçik çəkili danalar və quzular bir az baha, iri heyvanlar isə nisbətən ucuz olur. Qəssablar iri heyvanlara üstünlük vermir. Qiymət bahalaşdığından tələbat azalıb və gün ərzində iri heyvanın əti tam satılmır. Bundan əlavə, heyvanlara verilən 15-20 kiloqramlıq preslənmiş yonca 2,5-3,5 manata satılır. Yem baha olduğundan, ətin qiymətinə də təsir edir.

80-100 kiloqramlıq danalar 600-750 manata alınır. 100 kiloqramlıq danadan qəssab 70 manat xeyir götürsə də, alver etdiyi bazar sahibinə və baytara 15 manat pul ödəyir, heyvanın daşınma xərci isə 20-30 manat təşkil edir. Qəssablar ən yaxşı halda 30-50 manat pul qazana bilir. Bazar münasibətlərindən kənar görülən inzibati tədbirlər isə əti qıtlaşdırır və bu ətin bahalaşmasına səbəb olur. Toylar da ətin bahalaşmasına təsir edir. Belə ki, orta səviyyəli toyda 180-200 kq mal, 80-100 kq isə qoyun əti istifadə olunur. Şirvan şəhərində gün ərzində 4-5 toyda ay ərzində 25-30 ton mal əti istifadə edilir. Şəhərdə hər gün 15-20 nöqtədə 100-150 kq-lıq heyvanlar kəsilir. Bu isə ay ərzində 450-600 ədəd heyvan deməkdir. Əhaliyə satılan heyvanların da sayı ay ərzində təxminən 600 başdır. Deməli, tək Şirvan şəhərində il ərzində 14 mindən çox heyvanın əti istehlak olunur.