Aqrar-sənaye kompleksi

Ana səhifə

BMT: Kasıb ölkələrdə illərlə aclıq olacaq

10 oktyabr 2011 15:39 (UTC +04:00)

«APA-Economics»in məlumatına görə, bu barədə BMT-nin Ərzaq və Kənd Təsərrüfatı Təşkilatının (FAO) hesabatında bildirilir.

Hesabata görə, bu hal idxaldan asılı olan ölkələrdə əhalinin kasıb təbəqələri arasında aclığa səbəb ola bilər.

Fevralda ərzaq mallarının qiymət indeksi tarixi maksimuma çatıb və «ərəb baharı» adlanan inqilab və iğtişaşların əsas səbəblərindən olub. O vaxtdan indiyədək ərzaq bir qədər ucuzlaşsa da, FAO qiymətlərin yenidən artacağını bildirir. Təşkilat qeyd edir ki, bunun səbəbi dünya iqtisadiyyatındakı qeyri-müəyyənlik, neftin qiyməti, təbii fəlakətlərin baş verməsi ehtimalının artmasıdır.

Hesabatda deyilir ki, orta müddətli perspektivdə ərzağın qiymətlərinin artmasının əsas səbəbləri ən dinamik inkişaf etməkdə olan ölkələrdə tələbatın artması, əhalinin ümumi artımı və bioyanacaq üçün ayrılan sahələrin artmasıdır. BMT dünyada yoxsulların sayının 2009-cu ildəki 1,02 mlrd. nəfərdən 2015-ci ildə 600 mln. nəfərə endirməyi qarşısına məqsəd qoyub. Amma ərzaqla bağlı mürəkkəb vəziyyətə görə bunu etmək çətin olacaq.

FAO-nun qiymətləndirmələrinə görə, aclıq təhlükəsini kasıb ölkələrə ərzaq yardımını artırmaq, eləcə də, kənd təsərrüfatına uzunmüddətli investisiya qoymaqla azaltmaq olar.