Aqrar-sənaye kompleksi

Ana səhifə

Dünya Bankı Azərbaycana yeni irihəcmli kredit ayırıb

25 oktyabr 2011 13:23 (UTC +04:00)

DB-nın Azərbaycandakı daimi nümayəndəliyindən «APA-Economics»ə verilən məlumata görə, Azərbaycan hökuməti tərəfindən maliyyələşəcək 34,3 mln. dollar da nəzərə alınmaqla layihənin ümumi dəyəri 114,3 mln. dollar təşkil edir. Sazişlər Azərbaycanın maliyyə naziri Samir Şərifov, «Meliorasiya və Su Təsərrüfatı» ASC-nin sədri Əhməd Əhmədzadə və DB-nın Azərbaycan üzrə ölkə meneceri Cozef Ouen tərəfindən imzalanıb.

Layihənin Azərbaycanın 27 rayonunda yerləşən 760 min kiçik fermer təsərrüfatlarında məhsuldarlığın artırılmasına xidmət edəcəyi gözlənilir. Buna DB-nın yeni maliyyələşdirməsi ilə dəstəklənən ölkənin fermer təsərrüfatı üçün irriqasiya və drenaj şəbəkəsinin bərpası və müvafiq potensialın yaradılması sayəsində nail olunacaq.

«Bu layihə Azərbaycanın kənd təsərrüfatının potensialının reallaşmasına kömək edəcək. İrriqasiya sistemlərinin bərpası kənd təsərrüfatı istehsalında inkişafı dəstəkləyəcək, yeni iş yerlərinin yaranmasına, fermerlərin və kənd sakinlərinin gəlirlərinin artmasına səbəb olacaq. Bu layihə həmçinin ölkədəki təsərrüfatlararası suvarma şəbəkələrinin idarə edilməsini də gücləndirəcək», - deyə C.Ouen bildirib.

SİBL – təsərrüfatlararası suvarma sisteminin idarə olunması üzrə cavabdeh qurum olan Su İstifadəçiləri Birliklərinin (SİB) potensialının gücləndirilməsinə istiqamətlənib. Bu layihə təxminən 900 min hektarda yerləşən 379 SİB-ə öz üzvlərinə su təchizatını yaxşılaşdırmaq üçün təlim verəcək və dəstək göstərəcək. Layihə eyni zamanda 85 500 hektar əraziyə xidmət edən 34 SİB-in yararlanacağı 3 min km-lik irriqasiya və drenaj kanalları və suyun nizamlanması qurğularının bərpasını maliyyələşdirəcək.

Layihə üç komponentdən ibarətdir. Belə ki, institusional gücləndirmə və potensialın yaradılması komponenti mərkəzi qurumlar və SİB-lər üçün institusional gücləndirmə və potensialın yaradılması üzrə fəaliyyəti maliyyələşdirəcək. Təsərrüfatlararası suvarma və drenaj sistemlərinin bərpası komponenti seçilmiş rayonlarda SİB-lərin xidmət etdiyi suvarma və drenaj sistemlərinin bərpasını maliyyələşdirəcək. Layihənin idarə olunması komponenti isə layihənin idarə olunması və monitorinq və qiymətləndirmənin həyata keçirilməsini maliyyələşdirəcək.

Qeyd edək ki, Azərbaycan 1992-ci ildən DB-nın üzvüdür. Hazırda Bankın Azərbaycanda 43 layihə üzrə ümumi portfeli 2,9 mlrd. dollar təşkil edir.