Aqrar-sənaye kompleksi

Ana səhifə

Qeyri-neft ixracının artırılmasında ekoloji təmiz kənd təsərrüfatının rolu ilə bağlı konfrans keçirilib

04 noyabr 2011 12:22 (UTC +04:00)

Bakı - APA-Economics. Bu gün Bakıda İqtisadi İnkişaf Nazirliyinin (İİN) İqtisadi İslahatlar Elmi-Tədqiqat İnstitutunun və Türk Əməkdaşlıq və İnkişaf Agentliyinin (TİKA) təşkilatçılığı ilə “Qeyri-neft ixracının artırılmasında ekoloji təmiz kənd təsərrüfatının rolu (Türkiyə-Azərbaycan təcrübə mübadiləsi)” mövzusunda Konfrans keçirilib.

Nazirlikdən “APA-Economics”ə verilən məlumata görə, tədbirdə Azərbaycan və Türkiyə tərəfdən müvafiq dövlət qurumlarının və elmi-tədris müəssisələrinin nümayəndələri iştirak ediblər.

Konfransı giriş sözü ilə açan İİN-in İqtisadi İslahatlar Elmi-Tədqiqat İnstitutunun direktoru Vilayət Vəliyev Azərbaycan Respublikasının Prezidenti cənab İlham Əliyev tərəfindən həyata keçirilən uğurlu iqtisadi siyasət nəticəsində ölkə iqtisadiyyatının davamlı inkişaf etdiyini qeyd edib. Bildirilib ki, ölkəmizdə dünya standartlarına uyğun, yüksək keyfiyyətli məhsul istehsal edən müəssisələr mövcuddur və onların sayı davamlı olaraq artır. Azərbaycanda istehsal edilən qeyri-neft məhsulları müxtəlif ölkələrə ixrac edilir. Dünyada ekoloji təmiz kənd təsərrüfatı məhsullarının istehsalının artdığını vurğulayan Vilayət Vəliyev Azərbaycanda bu sahənin daha da inkişafı üçün zəngin təbii ehtiyatların və geniş imkanların olduğunu, ekoloji təmiz kənd təsərrüfatının qeyri-neft sektorunun və sahibkarlığın inkişafında əhəmiyyətini diqqətə çatdırıb.

AMEA-nın birinci vitse-prezidenti, akademik Arif Həşimov çıxış edərək ekoloji təmiz kənd təsərrüfatının əhəmiyyətindən, bu sahənin qeyri-neft ixracının genişlənməsindəki rolundan danışıb.

TİKA-nın Bakı üzrə Proqram koordinatoru Salih Polat, Samsun Valiliyinin nümayəndəsi Eyüp Elmas, Türkiyənin İnkişaf Nazirliyinin eksperti Pınar Topçu, 19 Mayıs Universitetinin Bafra Məslək Məktəbinin nümayəndəsi Ali Kemal Ayan, Kənd Təsərrüfatı və Heyvandarlıq Nazirliyinin əməkdaşı Fatma Mamak və Suat Parıldar isə ekoloji təmiz kənd təsərrüfatı sahəsində beynəlxalq təcrübə, ekoloji təmiz kənd təsərrüfatının regionların və sahibkarlığın inkişafında rolu, Türkiyənin bu sahədəki təcrübəsi və kadr hazırlığı barədə məruzələrlə çıxış ediblər.

Sonda konfransda səsləndirilən təkliflərlə bağlı müzakirələr aparılmış, tədbir iştirakçılarının sualları cavablandırılıb.