Aqrar-sənaye kompleksi

Ana səhifə

Azərbaycan dənli bitki istehsalını 23% artırıb

14 noyabr 2011 10:06 (UTC +04:00)

Bakı. Əli Əhmədov – APA-Economics. Bu il Azərbaycanda dənli bitkilərin yığımı ötən ilə nisbətən 22,9% artıq olub. «APA-Economics»in Kənd Təsərrüfatı Nazirliyinə istinadən verdiyi məlumata görə, noyabrın 1-dək əkin sahələrindən 2 455,880 min ton dənli bitki yığılıb ki, bu da ötən ilki göstəricidən 22,9% artıqdır.

Qeyd edək ki, hazırda biçin davam edir – 967 338 hektar əkin sahəsindən hələ biçilməmiş 746 hektar qalıb. Nazirliyin hesablamalarına görə, biçin tam başa çatanda 2,458 mln. ton dənli bitki toplanacaq.

Dənli bitkilər arasında buğda istehsalı ötən ilə nisbətən 25%-dən çox artıb. Noyabrın 1-dək 1 639,912 min ton buğda toplanıb ki, bu da 2010-cu ildən 25,3% artıqdır. Məhsuldarlıq isə ötən ilki 19,9 sentner/ha-dan 25,1 sentner/ha-ya çatıb.

Ümumilikdə, nazirliyin məlumatlarına görə, bu il bitkiçilik məhsullarının əksəriyyətində artım müşahidə olunub. Qarğıdalı dəni yığımı ötən ilə nisbətən 11,8%, dən üçün günəbaxan 26,7%, şəkər çuğunduru (emal üçün) 6,5%, tərəvəz 2,4%, ərzaq üçün bostan məhsulları 10,3%, meyvə istehsalı 9,9%, üzüm istehsalı 6,2%, tütün yarpağı istehsalı 11,7% artıb. Eləcə də demək olar ki, bütün məhsullar üzrə əkin sahələri genişlənib. Əvəzində, bu il kartof və yaşıl çay yarpağı istehsalı müvafiq olaraq 1,7% və 3,2% azalıb.