Aqrar-sənaye kompleksi

Ana səhifə

Azərbaycanın Oğuz rayonunda qarğıdalı emalı və qlükoza istehsalı müəssisəsinin açılışı olub

16 noyabr 2011 15:51 (UTC +04:00)

“APA-Economics”-in xəbərinə görə, dövlət başçısına məlumat verilib ki, bu müəssisə Azərbaycan Respublikası regionlarının sosial-iqtisadi inkişafı Dövlət proqramlarına uyğun olaraq “CPC” (Corn Processing Company) Məhdud Məsuliyyətli Cəmiyyət tərəfindən inşa edilib. Müəssisənin yaradılmasına 18 milyon manat sərmayə qoyulub. Bu vəsaitin 3 milyon manatını Sahibkarlığa Kömək Milli Fondunun güzəştli kreditləri təşkil edir.

Prezident İ. Əliyev qlükoza, özək, kəpək, qlüten və digər hazır məhsulların, eləcə də qlükozanın istehsal prosesinin nümayiş etdirildiyi stendə baxıb.

Sonra dövlət başçısı müəssisəni işə salıb.

Bildirilib ki, müəssisədə əsasən Türkiyə, ABŞ, Almaniya və İtaliya istehsalı olan avadanlıq quraşdırılıb. Müəssisənin istehsalat korpusu ilə yanaşı, hər birinin tutumu 500 ton olan iki taxıl anbarı və digər köməkçi binalar inşa edilib. Gələcəkdə hər birinin tutumu min ton olan daha iki taxıl anbarının tikintisi planlaşdırılır. Müəssisə gündəlik 80 ton qarğıdalı emalından 55 ton yüksək keyfiyyətli qida qlükozası və 20 tonadək müxtəlif növ yem məhsulları istehsal etmək gücünə malikdir. Burada 153 nəfər işlə təmin edilib.

Qeyd edilib ki, bu cür müəssisə Cənubi Qafqazda ilk olaraq Azərbaycanda inşa olunub. Müəssisədə ilkin mərhələdə qlükoza, daha sonra isə fruktoza və dekstroza məhsullarının istehsalı nəzərdə tutulur. Həmin məhsullardan əsasən şirniyyat, konserv, süd məmulatı, dondurma və limonad istehsalında istifadə olunacaq. Bu layihənin həyata keçirilməsi nəticəsində Azərbaycanda taxılçılığın, o cümlədən qarğıdalı istehsalının artırılması üçün əlverişli şərait yaranacaq və qarğıdalı emalından alınan məhsulların idxalının qarşısı alınacaq. Müəssisə Azərbaycanın tələbatının yerli istehsal hesabına yüksək keyfiyyətli qida qlükozası, protein, qlüten, kəpək və sair məhsullarla təminatına tam imkan yaradır. İstehsal prosesi zamanı yaranan tullantılar isə yem məhsulu kimi heyvandarlıqla məşğul olan fermerlərə satılacaq.

Bildirilib ki, müəssisənin xammal bazası yerli istehsal hesabına formalaşacaq. Bu məqsədlə Zaqatala, Şəki, Qax və Oğuz rayonlarında fəaliyyət göstərən fermerlərlə danışıqlar aparılır. Gələcəkdə kifayət qədər xammal bazası formalaşdırıldıqdan sonra müəssisənin gündəlik emal gücünün 80 tondan 200 tona çatdırılması nəzərdə tutulur.

Müəssisə ilə yaxından tanış olan prezident İ. Əliyev kollektivə uğurlar arzulayıb, tapşırıq və tövsiyələrini verib.