Aqrar-sənaye kompleksi

Ana səhifə

Azərbaycanda kənd təsərrüfatı istehsalı 7% artıb

18 noyabr 2011 06:41 (UTC +04:00)

Bakı. Nicat Mustafayev – APA-Economics. Bu ilin yanvar-oktyabr ayları ərzində Azərbaycanın kənd təsərrüfatında ümumi məhsul istehsalı ötən ilin analoji dövrünə nisbətən 7,1% artıb.

Dövlət Statistika Komitəsindən «APA-Economics»ə verilən məlumata görə, aqrar bölmədə məhsul yığımı başa çatmaq üzrədir. Bu ilin noyabrın 1-dək Azərbaycan tarlalarından qarğıdalı ilə birlikdə 2 455,9 min ton taxıl, 937,5 min ton kartof, 1 184,6 min ton tərəvəz, 615,9 min ton meyvə və giləmeyvə, 477,6 min ton bostan məhsulları, 115 min ton üzüm, 3,5 min ton tütün, 190,6 min ton şəkər çuğunduru, 513,6 ton yaşıl çay yarpağı toplanıb. Noyabrın 1-nə kimi 41,9 min ton pambıq toplanıb, emal müəssisələrinə təhvil verilib.

«İlin əvvəlindən keçən vaxt ərzində diri çəkidə 373,7 min ton ət, 1 361,4 min ton süd, 834,3 mln. ədəd yumurta və 15,9 min ton yun istehsal olunub ki, 2010-cu ilin müvafiq dövrünə nisbətən ət istehsalı 4,2%, süd istehsalı 6,3%, yun istehsalı 3,9% artıb, yumurta istehsalı isə 16% azalıb», - deyə Komitədən bildirilib.

Beləliklə, hesabat dövründə bitkiçilik məhsulları istehsalı 9,9%, heyvandarlıq məhsulları istehsalı 3,5%, kənd təsərrüfatının ümumi məhsulu isə 7,1% ötən ilki səviyyədən yüksək olub.

Kənd əməkçiləri gələn ilin məhsulu üçün 769,5 min hektar sahədə şum qaldırıb, 386,4 min hektar sahədə dən üçün taxıl, o cümlədən 243,2 min hektar sahədə buğda, 143,2 min hektar sahədə arpa səpiblər.