Aqrar-sənaye kompleksi

Ana səhifə

Bakıda «Kənd təsərrüfatı kooperasiyası haqqında» qanun layihəsinin ictimai müzakirəsinə dair dəyirmi masa keçirilib

19 noyabr 2011 08:53 (UTC +04:00)

Bakı. Ramil Məmmədli – APA. Bu gün Bakıda «İnsan Hüquqları üzrə Maarifləndirmə» İctimai Birliyi və ATƏT-in Bakı ofisinin təşəbbüsü ilə «Kənd təsərrüfatı kooperasiyası haqqında» qanun layihəsinin ictimai müzakirəsinə dair dəyirmi masa keçirilib.

APA-nın məlumatına görə, «İnsan Hüquqları üzrə Maarifləndirmə» İctimai Birliyinin sədri İradə Cavadova deyib ki, kiçik və orta sahibkarların qarşıya çıxdığı problemlər bu qanun layihəsinin hazırlanmasına stimul verib. Qanun layihəsi hazırlanan zaman müddəalarda problemlərin həllinə yönələn məqamları əhatə edilib. İ.Cavadova qanun layihəsinin 57 maddədən ibarət olduğunu deyib.

Qanun layihəsi haqqında hüquqi mülahizələrə dair isə ekspert Sərvər Süleymanlı danışıb. S.Süleymanlı sənədi müddəalar üzrə təhlil edib və bəzi irad və təkliflərini bildirib.

Milli Məclisin Aqrar siyasət Komitəsinin nümayəndəsi Zahid Abbasov bəzi iradlarla razılaşmayıb. O deyib ki, irad bildirilən müddəaların əksəriyyətində artıq dəyişiklər aparılıb və mübahisə doğuran məqamlara aydınlıq gətirilib: «Kooperativlərin yaradılması və emal müəssisələrinin həmin kooperativ sahibləri tərəfindən fəaliyyət göstərməsi kənd təsərrüfatı ilə məşğul olanların xeyirinədir».

Milli Məclisin deputatı Əli Məsimli bildirib ki, Azərbaycanda ciddi aqrar islahatları aparılıb: «Lakin 1995-ci ildən indiyə qədər aparılan islahatlar zamanı səhvlərə də yol verilib. Bu baxımdan Azərbaycanda aqrar sahə hələ də acınacaqlı vəziyyətdədir. Bu baxımdan kooperativlərin yaradılması vacibdir. Almaniya təcrübəsi öyrənilsə də həmin praktika tətbiq olunmayıb, 179 kooperativ yaradılsa da nəticələr qənaətbəxş deyil. Aqrar islahatlar mini-vətəndaş müharibəsidir. Burada ehtiyatlı olmaq və vətəndaşları nəzərə almaq lazımdır. Türkiyə bu məsələdə bir dəfə yanlışlığa yol verib. Yəni kooperativlərlə bağlı düzgün qərar verilməsə kolxoz modelinə çevriləcək».

Ə.Məsimli qanunun aydın və işlək olmasının vacibliyini də qeyd edib: «İnanıram ki, bu qanun layihəsi Milli Məclisin Aqrar siyasət Komitəsi tərəfindən bütün meyarlar nəzərə alınaraq hazırlanacaq».

Kənd Təsərrüfatı Nazirliyi aqrar islahatlar, kənd əraziləri və sahibkarlığın inkişafı şöbəsinin müdiri İslam İbrahimov bildirib ki, qəbul ediləcək qanun kəndlinin maraqlarını özündə əks etdirməklə yanaşı, qarşıya problemlərin çıxmasını əngəlləməlidir: «İşləməyən qanun bizə lazım deyil. Yəni, kəndlinin əlində bir qanun olmalı və kənara sapınmalara imkan verilməməlidir. Kəndli gedib mülki məcəllə axtarmamalıdır. Gəlin elə baza yaradaq ki, kəndlinin qarşısını kəsməsin».

Aparılan müzakirələrdə həmçinin ATƏT-in Bakı ofisinin iqtisadi və ekologiya şöbəsinin müdiri Yan Olsson, Azad İstehlakçılar Birliyinin sədri Əyyub Hüseynov və digərləri qanun layihəsi ilə bağlı fikir və mülahizələrini söyləyiblər.