Aqrar-sənaye kompleksi

Ana səhifə

Azərbaycanda fermerlər məhsullarını SMS-lə sata biləcək

29 noyabr 2011 13:49 (UTC +04:00)

«APA-Economics»in məlumatına görə, bundan sonra fermerlər 6955 saylı telefona zəng etmək və ya SMS göndərməklə satmaq istədikləri məhsullar barədə məlumat verə biləcəklər. Digər istifadəçilər isə bu nömrə ilə əlaqə yaratmaqla həm fermerlərin satdığı məhsulların qiymətindən, həm də ölkənin istənilən regionundakı əsas bazarlarda ərzaq mallarının qiyməti barədə məlumat ala biləcəklər.

Bazar İnformasiya Kommersiya Mərkəzi (BİKM) adlanan bu sistemin məlumatları internetdə də yerləşdirilir. Qeyd edək ki, BİKM Dünya Bankı və Azərbaycan hökumətinin dəstəyi ilə Kənd Təsərrüfatı Nazirliyi yanında Kənd Təsərrüfatı Kreditləri üzrə Dövlət Agentliyi tərəfindən həyata keçirilən «Kənd təsərrüfatının inkişafı və kreditləşdirilməsi Layihəsi-II» çərçivəsində yaradılıb.

Layihənin əlaqələndricisi Nizami Qarayev «APA-Economics»ə bildirib ki, layihədə məqsəd kənd, bazar əlaqələrinin yaradılması olub: «Kənd-bazar əlaqələrini yaratmaq dedikdə, söhbət kənd təsərrüfatı məhsullarının qiymətlərinin ictimaiyyətə çatdırılmasından gedir».

Layihə çərçivəsində qiymət toplayan işçilər tərəfindən ölkənin 10 iqtisadi bölgəsindəki əsas bazarlarda 83 adda kənd təsərrüfatı məhsullarının gündəlik bazar qiymətləri toplanır və internet vasitəsilə bu sistemə göndərilir.

N.Qarayev bildirib ki, həmin informasiyalar mərkəzdə işləndikdən sonra www.agrobusiness.az internet səhifəsi vasitəsilə bundan istənilən şəxs istifadə edə bilər: «Qiymətlər toplananda minimum-maksimum və orta qiymət əsas götürülür, pərakəndə və topdan satış qiymətləri nəzərə alınır. Bunun əsasında da toplanmış informasiyalar 6955 sistemi vasitəsilə istənilən istifadəçi tərəfindən istifadə oluna bilər».

Qeyd edək ki, 6955-dən istifadə qaydaları sadədir. Zəng zamanı istifadəçiyə bələdçi qoşulur, o müəyyən yönləndirici suallarla istifadəçinin hansı bazarlardan və hansı məhsulun qiymətini öyrənmək istədiyini dəqiqləşdirir. Bundan sonra həmin qiymət SMS-lə istifadəçiyə göndərilir. SMS-də minimum-maksimum və orta qiymətlər, eləcə də topdansatış, pərakəndə satış və fermer satış qiymətləri barədə məlumatlar verilir.

Layihənin əlaqələndiricisi vurğulayıb ki, fermerlər isə bu sistemə öz məhsullarının satılması üçün müraciət edə bilərlər: «Fermerin öz məhsulu barədə verdiyi məlumatın içərisində məhsulun adı, miqdarı, keyfiyyət göstəricisi və qiyməti haqqında informasiya olur. Sonradan bu məhsullar barədə məlumatlar da sayta yerləşdirilir. Nəticədə digər istifadəçilər də görür ki, hansı bölgədə hansı məhsul neçəyədir».

Bununla yanaşı bildirilir ki, sistemdən istifadə zamanı bəzi xidmətlər pulludur. Məsələn, fermerlərin bura məlumat yerləşdirməsi xidməti pulsuzdur. Amma qiymətlər barədə məlumatın alınması pulludur.

Qeyd edək ki, 6955-dən iki cür istifadə etmək olar: zəng vurub qiymətləri öyrənmək, SMS göndərərək qiyməti almaq mümkündür. Hər iki variantda xidmət haqqı 40-45 qəpik arasında dəyişir.
Bundan başqa, sistemdə ölkənin müxtəlif yerlərində kənd təsərrüfatı məhsullarının emalı ilə məşğul olan müəssisələrin bazası yaradılır və bu barədə fermerlər və digər istifadəçilər məlumat ala bilər.