Aqrar-sənaye kompleksi

Ana səhifə

Azərbaycanda üzümçülüklə məşğul olanlara uzunmüddətli kreditlər veriləcək

16 dekabr 2011 09:38 (UTC +04:00)

Bakı. Əli Əhmədov – APA-Economics. Azərbaycanda üzümçülük sahəsində çalışanlar uzunmüddətli kreditlərlə təmin olunacaq, daxili bazarın isə haqsız rəqabətdən qorunması üçün tədbirlər görüləcək. «APA-Economics»in məlumatına görə, bu, prezident İlham Əliyevin dekabrın 15-də təsdiqlədiyi Azərbaycanda üzümçülüyün inkişafına dair Dövlət Proqramında (2012-2020-ci illər) nəzərdə tutulub.

Dövlət Proqramının məqsədi əhalinin təzə və keyfiyyətli süfrə üzümünə olan tələbatının daha dolğun ödənilməsi, şərabçılıq və üzüm emalı müəssisələrinin xammal təminatının yaxşılaşdırılması, şərab və üzüm məhsullarının ixracının artırılması üçün ölkədə üzümçülüyün inkişafını stimullaşdırmaqdan ibarətdir.

Buna nail olmaq üçün proqramda üzüm əkin sahələrinin genişləndirilməsi, yeni üzümlüklərin salınması, tingçilik təsərrüfatlarının yaradılmasının dəstəklənməsi, üzümçülüyün infrastruktur təminatının yaxşılaşdırılması və üzüm istehsalı və emalı sahəsində innovativ texnologiyaların tətbiqinin dəstəklənməsi nəzərdə tutulur. Bundan başqa, sənəddə üzüm və şərabçılıq məhsulları emalı müəssisələrinin fəaliyyətinin bərpası və yeni belə müəssisələrin yaradılmasının stimullaşdırılması, üzüm məhsullarının «plantasiya-istehlakçı» sxemi ilə satışının stimullaşdırılması mövsümlərarası dövrlərdə əhalinin fasiləsiz olaraq süfrə üzümü ilə təmin edilməsi məqsədi ilə anbar şəbəkələrinin və saxlanma kameralarının tikintisinin dəstəklənməsi nəzərdə tutulur. Dövlət proqramında üzümçülüyün inkişafı üçün üzüm və şərabçılıq məhsullarının rəqabət qabiliyyətliliyinin artırılması, onların ixracının stimullaşdırılması, daxili bazarın haqsız rəqabətdən qorunması və idxalın əvəzlənməsi səviyyəsinin yüksəldilməsi əksini tapıb.

Proqramda bildirilir ki, yeni üzüm plantasiyalarının salınması böyük həcmdə uzunmüddətli kapital qoyuluşu tələb etməklə bərabər, barvermə dövrünədək (təxminən 4-5 il ərzində) əkinə xidmət üçün əlavə maliyyə resurslarına ehtiyac yaradır. Bu məqsədlərə nail olmaq üçün üzümçülük və şərabçılıq sahəsində fəaliyyəti tənzimləyən normativ-hüquqi bazanın təkmilləşdirilməsi, institusional tədbirlərin həyata keçirilməsi, uzunmüddətli dövr üzrə üzümçülüyün inkişafını təmin edən maliyyələşdirmə mexanizmlərinin yaradılması və digər tədbirlər nəzərdə tutulur.

Dövlət proqramına əsasən, bu sahədəki tədbirlər dövlət büdcəsi, büdcədənkənar fondlar, Sahibkarlığa Kömək Milli Fondu, Azərbaycan İnvestisiya Şirkəti, Kənd Təsərrüfatı Nazirliyi yanında Kənd Təsərrüfatı Kreditləri üzrə Dövlət Agentliyi, yerli və xarici özəl birbaşa investisiyalar və digər mənbələr hesabına reallaşa bilər. Bu işlərin nəticəsi olaraq əhalinin süfrə və quru üzümə, şərabçılıq məhsullarına, üzüm emalı və şərabçılıq sənayesinin isə xammala olan tələbatının ödənilməsi, yeni iş yerlərinin yaradılması, kənd əhalisinin gəlirlərinin, eləcə də dövlət büdcəsinə və yerli büdcəyə daxilolmaların artımı, kənd yerlərində sosial şəraitin yaxşılaşdırılması gözlənilir.