Aqrar-sənaye kompleksi

Ana səhifə

İsveçrə Azərbaycan üçün kənd təsərrüfatı mütəxəssisləri hazırlaya bilər

26 dekabr 2011 08:15 (UTC +04:00)

Bakı. Əli Əhmədov - APA-Economics. Azərbaycan Dövlət Aqrar Universitetinin tələbələri fermer təsərrüfatlarında təcrübə keçə bilər və magistr təhsillərini İsveçrənin aqrar yönümlü universitetlərində davam etdirə bilərlər.

«APA-Economics»in məlumatına görə, bu məsələ kənd təsərrüfatı naziri İsmət Abasovun İsveçrə Konfederasiyasının Azərbaycandakı səfiri Sabine Ulmann Şabanla görüşündə müzakirə olunub.

Görüşdə Azərbaycanla İsveçrə arasında kənd təsərrüfatı sahəsində əlaqələrin mövcud durumu və genişləndirilməsi də müzakirə mövzusu olub. Bu məqsədlə Azərbaycan Kənd Təsərrüfatı Nazirliyi və İsveçrənin müvafiq dövlət qurumu arasında əməkdaşlığa dair Anlaşma Memorandumunun hazırlanması imkanlarının araşdırılması, baytarlıq və bitki karantini sahəsində əməkdaşlıq barədə sazişin imzalanmasının sürətləndirilməsi təklif edilib. Eləcə də İsveçrə İnkişaf və Əməkdaşlıq Agentliyi tərəfindən maliyyələşdirilən məcburi köçkünlər və qaçqınların yaşayış tərzində potensialın artırılmasına yönəldilmiş pilot layihələrin məcburi köçkünlər məskunlaşmış digər rayonların yeni salınmış qəsəbələrində həyata keçirilməsi imkanlarına baxılması təklif olunub.

Görüşdə İsveçrə tərəfinə Azərbaycan Dövlət Aqrar Universitetinin tələbələrinin İsveçrə Konfederasiyasının müxtəlif fermer təsərrüfatlarında təcrübə keçmələri və aqrar yönümlü universitetlərində magistratura təhsili almaları imkanlarına baxılması da təklif edilib.

Bundan başqa, iki ölkə arasında ekoloji təmiz kənd təsərrüfatı məhsullarının istehsalı, eləcə də bitkiçilik məhsullarının istehsalı və toxumçuluq üzrə müasir texnologiyaların tətbiqi sahəsində təcrübə mübadiləsi aparmaq nəzərdə tutulub. Kənd Təsərrüfatı Nazirliyi ölkəmizə İsveçrədən damazlıq südlük və ətlik istiqamətli malın satın alınıb gətirilməsi imkanlarına baxılmasını da təklif edib.