Aqrar-sənaye kompleksi

Ana səhifə

Nazir İsmət Abasov Berlində “Azərbaycanda kənd təsərrüfatının inkişafı” mövzusunda çıxış edib

23 yanvar 2012 12:38 (UTC +04:00)

Bakı - APA-Economics. Azərbaycanın kənd təsərrüfatı naziri İsmət Abasov Almaniyada keçirilən “Beynəlxalq Yaşıl Həftə - 2012” sərgisində və sərgi çərçivəsində Ərzaq və Kənd Təsərrüfatı üzrə Qlobal Forumda, Beynəlxalq Kənd Təsərrüfatı Nazirlərinin Panel Müzakirəsində və Kənd Təsərrüfatı Nazirlərinin 4-cü Berlin Sammitində iştirak etmək üçün Berlin şəhərində səfərdədir.
Kənd Təsərrüfatı Nazirliyinin mətbuat xidmətindən “APA-Economics”ə verilən məlumata görə, nazir Azərbaycanın Almaniyadakı səfiri Pərviz Şahbazov və FAO-nun Avropa üzrə regional nümayəndəsi xanım Fernanda Querrieri ilə birgə təşkil olunmuş mətbuat konfransında iştirak edərək, 2012-ci ilin aprel ayında Bakı şəhərində keçiriləcək FAO-nun Avropa üzrə Regional Konfransı barədə sərgi iştirakçılarına və Avropa ictimaiyyətinə geniş məlumat verib.
“Yaşıl Həftə” sərgisi çərçivəsində Almaniyanın Şərqi və Mərkəzi Avropa Cəmiyyəti və Azərbaycanın Almaniyadakı səfirliyi tərəfindən təşkil olunmuş tədbirdə İ.Abasov “Azərbaycanda kənd təsərrüfatının inkişafı” mövzusunda çıxış edib, Dövlət Proqramları və aqrar sahədəki nailiyyətlər, barədə ətraflı məlumat verib. Bildirib ki, ölkə Prezidenti cənab İlham Əliyevin gərgin və məqsədyönlü əməyi nəticəsində 2003-cü ildən 1 yanvar 2012-ci ilədək ölkə üzrə 1 mln. 7 min yeni iş yeri, o cümlədən kənd təsərrüfatında 265 min yeni iş yeri açılıb, yoxsulluq səviyyəsi 2003-cü ildəki 44,7%-dən 2011-ci ildə 7,6%-ə düşüb.
Nazir aqrar sahədə ixrac potensialının ilbəil artdığını, həmçinin Azərbaycanda istehsal olunmuş kənd təsərrüfatı məhsullarının Avropa bazarına çıxışı üçün bütün imkanların mövcudluğunu tədbir iştirakçılarının nəzərinə çatdırıb.