Aqrar-sənaye kompleksi

Ana səhifə

Azərbaycanda «Əmtəə balıqçılığı haqqında» qanunun qəbul edilməsi təklif olunur

24 yanvar 2012 12:39 (UTC +04:00)

Bakı. Elnur Hüseynquluyev - APA-Economics. Bu gün İqtisadi Tədqiqatlar Mərkəzi (İTM) Aqro-Biznes Mərkəzi ilə birlikdə Azərbaycanın balıqçılıq təsərrüfatlarında vəziyyəti əks etdirən layihəni başa çatdırıb.

«APA-Economics»in məlumatına görə, bu gün bununla bağlı keçirilən tədbirdə İTM-in İdarə Heyətinin sədri Qubad İbadoğlu bildirib ki, layihənin icrasına ABŞ Beynəlxalq İnkişaf Agentliyinin (USAID) maliyyə dəstəyi ilə həyata keçirilən “Azərbaycanda Rəqabətlilik və Ticarət layihəsi” çərçivəsində 2011-ci ilin aprel ayından başlanılıb. Layihə üzrə aparılmış tədqiqatın əsas vəzifəsi Azərbaycanın balıqçılıq təsərrüfatlarının əsas inkişaf tendensiyalarını və çətinliklərini müəyyənləşdirməklə bu sektorun vacibliyi, imkanları, mənfəətliliyi və rəqabətliliyinə dair müzakirələr aparmaqdır. Layihə 3 başlıca fazada həyata keçirilib ki, onun birinci həlqəsini daxili resurs xərcləri metodologiyası əsasında təhlil aparılması təşkil edib. İkinci fazaya sorğular və digər mənbələr vasitəsilə məlumatların toplanması daxildir. Bu faza müvafiq təşkilatlardan məlumatların əldə edilməsini təmin edib. Bununla yanaşı, təhlilin başlıca informasiya mənbələrini əsasən karp və qızılxallı balıq (forel) növlərini yetişdirən Salyan-Neftçala və Şəki-Zaqatala regionlarının fermerləri və ticarətçiləri arasında keçirilmiş sorğu materialları təşkil edib. Sonuncu fazada isə daxili resurs xərci təhlili metodologiyası əsasında təhlil aparılıb.

Q.İbadoğlunun sözlərinə görə, tədqiqat nəticəsində məlum olub ki, maliyyə məsrəflərinə baxmayaraq, iqtisadi nöqteyi-nəzərdən bu sektor, xüsusi ilə də karp təsərrüfatları rəqabətliliyin yüksək səviyyəsini özündə əks etdirmir. Belə ki, bu sektorun ixrac yönümü inkişaf etməyib, lakin tədqiqatlar göstərir ki, sektorda idarəçilik və xarici bazara yönümlü inkişaf strategiyası ilə onun ixrac potensialını yüksəltmək mümkündür.

Q.İbadoğlu aparılan tədqiqat nəticəsində dövlət siyasəti və texniki istiqamətlərdə çoxsaylı çətinliklərin aşkarlandığını, bunun da balıqçılıq təsərrüfatlarında nəinki istehsalın həcminə, həmçinin istehsal olunmuş məhsulun keyfiyyətinə mənfi təsir göstərdiyini bildirib. Həmçinin məlum olub ki, hökumət balıq yeminin və onun komponentlərinin ölkəyə gətirilməsi istiqamətində mövcud baryerlərin aradan qaldırılması və bu prosesin sadələşdirilməsi yolu ilə balıqçılıq sektorunda daha yaxşı nəticələrin əldə olunmasına nail ola bilər. Eyni zamanda forel istehsalı sahəsində nəticələr göstərib ki, bu sahədə daha yaxşı idarəçilik və balıq yeminin səmərəliyinin yüksəldilməsinə investisiya qoyulması yolu ilə əhəmiyyətli dərəcədə mənfəət əldə edilə bilər.

Daha sonra İTM-in bu sektorun inkişafı üçün tövsiyələri dinlənilib. Tövsiyələrdə balıq istehsalı sahəsində dövlət siyasətini özündə tam əks etdirən “Əmtəə balıqçılığı haqqında (akvakultura)” yeni qanun hazırlanaq qəbul olunması, həmçinin bu yeni qanun qəbul edilməsi zəruri hesab edilməzsə, “Balıqçılıq haqqında” qanunun 7-ci maddəsində balıqçılıq sahəsində dövlət siyasətinin əsas prinsipləri hissəsinə göl balıqçılığı ilə bağlı aparılacaq dövlət siyasətinin əlavə olunması və s. qeyd olunub.