Aqrar-sənaye kompleksi

Ana səhifə

Azərbaycanın Macarıstandakı səfirliyində FAO-nun 28-ci Regional Konfransı ilə bağlı mətbuat konfransı keçirilib

26 yanvar 2012 12:33 (UTC +04:00)

Bakı - APA-Economics. Azərbaycanın Macarıstandakı səfirliyi BMT-nin Ərzaq və Kənd Təsərrüfatı Təşkilatının (FAO) Avropa və Şərqi Asiya üzrə Regional Nümayəndəliyi və Macarıstan Regional İnkişaf Nazirliyinin birgə mətbuat konfransı keçirib.

“APA-Economics”in xəbərinə görə, səfirlikdə keçirilən mətbuat konfransı 2012-ci ilin aprel ayında Bakıda keçiriləcək FAO-nun 28-ci Regional Konfransına hazırlıq mərhələsində Macarıstan ictimaiyyətinə ətraflı məlumat vermək məqsədilə təşkil edilib.

Macarıstanın 30-a yaxın qəzet və elektron KİV nümayəndələri iştirak etdiyi mətbuat konfransında Azərbaycanın Macarıstandakı səfiri Vilayət Quliyev, FAO-nun baş direktor müavini, Avropa və Şərqi Asiya üzrə Regional Ofisinin rəhbəri Fernanda Geriyeri və Macarıstan Regional İnkişaf Nazirliyinin Beynəlxalq Əlaqələr İdarəsinin rəisi Zoltan Kalman çıxış ediblər.

Səfir V.Quliyev aprel ayında Bakıda 53 ölkənin kənd təsərrüfatı və ərzaq nazirlərinin, habelə beynəlxalq qurumların təmsilçilərinin iştirakı ilə keçiriləcək konfransın yüksək səviyyədə təşkili ilə əlaqədar Azərbaycan prezidenti və Azərbaycan hökuməti tərəfindən görülən işlər barəsində mətbuat nümayəndələrinə ətraflı məlumat verib. Səfir eyni zamanda son illərdə Azərbaycanın iqtisadi siyasəti, ərzaq təhlükəsizliyinin təmin olunması sahəsində atılan addımlar, ölkədə həyata keçirilən iri layihələr, qeyri-neft sektorunun sürətli inkişafı ilə bağlı məlumatları mətbuat nümayəndələrinin diqqətinə çatdırıb.

Daha sonra mətbuat nümayəndələrinin sualları cavablandırılıb. Jurnalistlər Regional Konfransla yanaşı, Azərbaycanın iqtisadi və turizm imkanları, ölkədə ərzaq təhlükəsizliyi probleminin həlli, Macarıstanla Azərbaycan arasındakı əlaqələr və s. barəsində müxtəlif suallar səsləndiriblər.

Səfirlik Azərbaycan hökuməti adından FAO-nun Bakı konfransına hazırlıq məqsədilə Budapeştdə keçirilən Məşvərət görüşünün iştirakçıları şərəfinə qəbul düzənləyib.