Aqrar-sənaye kompleksi

Ana səhifə

Bakıda «Ekoloji təmiz kənd təsərrüfatının, o cümlədən üzümçülüyün inkişaf perspektivləri» mövzusunda dəyirmi masa keçirilib

13 mart 2012 13:18 (UTC +04:00)

Bakı. Nicat Mustafayev - APA-Economics. Azərbaycan İqtisadi İnkişaf Nazirliyinin İqtisadi İslahatlar Elmi-Tədqiqat İnstitutu və Türkiyə Baş Nazirliyinin Türk Əməkdaşlıq və Koordinasiya Agentliyinin birgə təşkilatçılığı ilə “Azərbaycanda ekoloji təmiz kənd təsərrüfatının inkişaf etdirilməsi sahəsində Türkiyə təcrübəsinin öyrənilməsi və qurumlar arasında əməkdaşlığın gücləndirilməsi” layihəsi çərçivəsində “Ekoloji təmiz kənd təsərrüfatının, o cümlədən üzümçülüyün inkişaf perspektivləri” mövzusunda dəyirmi masa keçirilib.

Nazirlikdən «APA-Economics»ə verilən məlumata görə, tədbirdə İqtisadi İnkişaf Nazirliyinin və digər aidiyyəti dövlət qurumlarının, Türkiyə Qida, Kənd Təsərrüfatı və Heyvandarlıq Nazirliyinin, Türkiyə Əməkdaşlıq və Koordinasiya Agentliyinin, Ege Universitetinin nümayəndələri və sahibkarlar iştirak ediblər.

Tədbirdə çıxış edən İqtisadi İnkişaf Nazirliyinin İqtisadi İslahatlar Elmi-Tədqiqat İnstitutunun direktoru Vilayət Vəliyev Azərbaycan iqtisadiyyatında dinamik inkişafı təmin edən amillər, davamlı sosial-iqtisadi inkişaf mərhələsində qarşıda duran vəzifələr, ayrı-ayrı iqtisadi sahələrdə həyata keçirilən modernləşmə prosesinin əhəmiyyəti və gələcək perspektivlər barədə məlumat verərək qeyd edib ki, Azərbaycanda dünya standartlarına uyğun, yüksək keyfiyyətli məhsul istehsal edən müəssisələr mövcuddur və onların sayı davamlı olaraq artır. Azərbaycanda istehsal edilən qeyri-neft məhsulları müxtəlif ölkələrə ixrac edilir. Dünyada ekoloji təmiz kənd təsərrüfatı məhsullarının istehsalının artdığını vurğulayan V.Vəliyev Azərbaycanda bu sahənin daha da inkişafı üçün zəngin təbii ehtiyatların və geniş imkanların olduğunu, ekoloji təmiz kənd təsərrüfatının qeyri-neft sektorunun və sahibkarlığın inkişafında əhəmiyyətini diqqətə çatdırıb.

V.Vəliyevin sözlərinə görə, «2012-2020-ci illərdə üzümçülüyün inkişafına dair Dövlət Proqramı»nın icrası ölkədə üzümçülüyün və şərabçılığın inkişaf etdirilməsinə, aqrar sahənin gəlirliliyinin və ixracat potensialının artırılmasına və kənd əhalisinin maddi rifahının yüksəldilməsinə əlverişli şərait yaradacaq.

Öz növbəsində Türkiyənin Azərbaycandakı səfirliyinin əməkdaşı Fərrux Tığlı Türkiyə Əməkdaşlıq və İnkişaf Agentliyinin Bakı nümayəndəliyinin fəaliyyəti və Azərbaycanda həyata keçirdiyi layihələrdən bəhs edib, ekoloji təmiz kənd təsərrüfatı sahəsində beynəlxalq təcrübə, ekoloji təmiz kənd təsərrüfatının və üzümçülüyün sahibkarlığın inkişafında rolu, Türkiyənin bu sahədəki təcrübəsi barədə məlumat verib.

İqtisadi İslahatlar Elmi-Tədqiqat İnstitutunun Sahibkarlıq və regional inkişaf problemləri şöbəsinin baş elmi işçisi Həzi Eynalov «Ekoloji təmiz kənd təsərrüfatının inkişafının zəruriliyi və əsas inkişaf istiqamətləri», Ege Universitetinin professoru Uygün Aksoy «Dünyada və Türkiyədə ekoloji təmiz kənd təsərrüfatı”, Yalova Atatürk Baxça Mədəniyyət Mərkəzi Tədqiqat İnstitutunun şöbə müdiri, professor Gülay Bəşirli «Türkiyədə Ekoloji təmiz kənd təsərrüfatının inkişafı» mövzularında məruzələrlə çıxış ediblər.