Aqrar-sənaye kompleksi

Ana səhifə

Macarıstanın Azərbaycandakı səfiri kənd təsərrüfatı naziri İsmət Abasovla görüşüb

13 mart 2012 15:07 (UTC +04:00)

Bakı. Əli Əhmədov - APA-Economics. Bu gün Azərbaycanın kənd təsərrüfatı naziri İsmət Abasov Macarıstanın Azərbaycandakı səfiri Jolt Çutora ilə görüşüb.

“APA-Economics”in məlumatına görə, Azərbaycanla Macarıstan arasında ikitərəfli əməkdaşlığın müzakirə edildiyi görüşdə nazir İsmət Abasov iki ölkənin Kənd Təsərrüfatı Nazirlikləri arasında əməkdaşlıq müqaviləsinin bağlandığını bildirib.

Razılaşmaya əsasən, 2011-ci ildə Macarıstandan Azərbaycana diri şəkildə toyuq, dənli bitkilər və meyvə idxal olunub, Azərbaycandan Macarıstana isə konservləşdirilmiş meyvə ixrac olunub. İki ölkə arasında imzalanmış sənədlər idxal-ixracda ölkələrə infeksion xəstəliklərin keçməsinin qarşısını da alıb.

Görüşdə İ.Abasov Macarıstanla bəzi istiqamətlərdə əməkdaşlıq əlaqələrinin yaradılmasına dair təkliflər irəli sürüb. Bura dənli və tərəvəz bitkilərinin sortları, meyvə, üzüm tinglərinin sınağı və mübadiləsi, təmiz ekoloji meyvə-tərəvəz istehsalı sahəsində əməkdaşlıq, aqrar profilli elmi tədqiqat və tədris müəssisələri arasında əməkdaşlıq, iribuynuzlu mal-qara və quşçuluq sahələri üçün kombinə edilmiş kiçik yem müəssisələri üzrə birgə layihələrinin hazırlanması, kənd təsərrüfatı kooperasiyalarının yaradılması sahəsində təcrübə mübadiləsi, qabaqcıl elmi nailiyyətlər üzrə təcrübə mübadiləsi, mal-qaranın süni mayalanmasına dair regionlarda texniki xidmət sahələrinin yaradılması aiddir.

Nazir həmçinin Macarıstanın kənd təsərrüfatı və kəndin inkişafı naziri Sandor Fazekasın aprelin 16-20-də Bakıda keçiriləcək Avropa Qeyri-Hökumət Vətəndaş Cəmiyyəti Təşkilatlarının Məsləhətləşməsi, Kənd Təsərrüfatı üzrə Avropa Komissiyasının 37-ci Sessiyası və FAO-nun Avropa üzrə Regional Konfransına dəvət edildiyini nəzərə çatdırıb.

Macarıstan səfiri Jolt Çutora iki ölkə arasında ənənəvi dostluq əlaqələrinin, eyni zamanda aqrar sahədə ikitərəfli əməkdaşlığın daha da genişlənməsinə əminliyini bildirib.