Aqrar-sənaye kompleksi

Ana səhifə

Azərbaycanın fitosanitar nəzarəti orqanı keyfiyyətsiz quru meyvələrlə bağlı Rusiya tərəfinin yaydığı məlumatlara aydınlıq gətirib

30 mart 2012 07:55 (UTC +04:00)

Bu barədə «APA-Economics»ə Kənd Təsərrüfatı Nazirliyi yanında Dövlət Fitosanitar Nəzarəti Xidmətinin mətbuat katibi Bəhmən Hüseynov bildirib.

Onun sözlərinə görə, bununla bağlı aşkar edilən hallar yalnız Rusiyaya gedən bir neçə şəxsin əl yükündə cüzi miqdarda qeydə alınıb: «Rusiya tərəfinin özünün rəsmi məlumatına görə, Azərbaycandan gətirilən mallar arasında yalnız 9 belə hal aşkar edilib. Bunların hamısı əl yükündə keçirilən və cüzi miqdarda aparılan mallardır».

Belə ki, keyfiyyətsiz malların ən böyük partiyası 4,7 kq, ən kiçik partiyası isə 560 qram olub. Həmin 9 haldan 7-də bu malların çəkisi 1 kq-dan da azdır: «Bu, vətəndaşların çantalarında şəxsi istifadə üçün aparılan paxlalılar, qovurulmuş noxud və s.-dir. Adətən çox kiçik həcmdə olduğu üçün bunu aparan şəxslər həmin məhsulların fitosanitar nəzarətindən keçməsi üçün müraciət etmirlər».

Əvəzində B.Hüseynov bildirib ki, belə məhsulların satış məqsədilə iri partiyalarla aparılması zamanı isə məhsullar ciddi nəzarətdən keçirilir: «Böyük partiya ilə aparılanda mütləq bizə müraciət olunur, məhsul karantin-ekspertiza və nəzarət-toksikologiya laboratoriyalarında yoxlanır və bundan sonra onlara ixrac sertifikatı verilir».

Ekspertiza zamanı keyfiyyəti uyğun olmayan məhsulların ixracına icazə verilmir. Yalnız çatışmazlıq aradan qaldırılandan sonra müsbət rəy verilir. Mətbuat katibinin sözlərinə görə, belə hallar böyük partiya məhsullarda aşkar ediləndə bununla bağlı rəsmi müraciətlər olur: «Amma az partiya olduğuna görə, heç bir müraciət daxil olmayıb».

Buna baxmayaraq Fitosanitar Nəzarəti Xidməti bu sahəyə diqqəti artırıb. Bu məsələ ilə əlaqədar olaraq Dövlət Gömrük Komitəsinə rəsmi məktub göndərilib ki, gələcəkdə belə halların təkrarlanmaması üçün hətta əl yüklərində aparılan məhsulların da yoxlanması üçün fitosanitar nəzarətinə müraciət edilsin.