Aqrar-sənaye kompleksi

Ana səhifə

«Baltika-Bakı» şirkəti «Eurovision-2012» müsabiqəsində iştirakla bağlı uduş aksiyası keçirir

30 mart 2012 13:14 (UTC +04:00)

Bakı. Nicat Mustafayev – APA-Economics. May ayında Bakıda keçiriləcək «Eurovision-2012» beynəlxalq mahnı müsabiqəsinin rəsmi tərəfdaşı olan Azərbaycanın əsas pivə istehsalçısı «Baltika-Bakı» şirkəti «Xırdalan» pivə brendindən «Eyrovision-a bilet qazan» aksiyasına start verib. «APA-Economics»in məlumatına görə, bu barədə «Baltika-Bakı»nın marketinq üzrə direktor müavini Şahruh Nizamutdinov bildirib.

Onun sözlərinə görə, sözügedən aksiya «Eurovision-2012» müsabiqəsinin finalınadək, yəni mayın 26-dək davam edəcək: «Müsabiqənin final mərhələsinə biletlər və digər qiymətli mükafatlar uğrunda yarışmada iştirak etmək üçün 1,5 litr və 0,5 litr şüşələrdə olan «Xırdalan Draft» və ya «Xırdalan» pivəsini əldə etmək və qapağın altına baxmaq lazımdır. Aksiya çərçivəsində «Eurovision-2012» müsabiqəsinin final mərhələsinə 100 ədəd bilet oynanılır».

Üzərində «Eurovision» yazısı olan qapaqlar biletin udulduğunu göstərir, qapağın üzərində 6 rəqəmli kod, «50 qəpik» və ya «1 manat» yazıları isə mobil telefon balansını bu məbləğlərdə artırmaq imkanını yaradır. Bu kodu 8808 nömrəsinə («Azercell» şəbəkəsindən başqa) göndərmək kifayətdir.

Ş.Nizamutdinov onu da qeyd edib ki, «Baltika-Bakı» zavodu «Xırdalan» pivə brendini rebrendinq edərək istehlakçıların istifadəsinə verib.

Qeyd edək ki, Xırdalanda yerləşən «Baltika-Bakı» zavodu (əvvəlki adı «Baku-Castel») 2000-ci ildən etibarən «Xırdalan» bredli pivə istehsal edir. Ötən il ərzində sözügedən pivənin istehsalı 1,5 mln. dekalitr təşkil edib.