Aqrar-sənaye kompleksi

Ana səhifə

Azərbaycanın kənd təsərrüfatı naziri FAO-nun baş direktoru ilə görüşüb - FOTO

Azərbaycanın kənd təsərrüfatı naziri FAO-nun baş direktoru ilə görüşüb - <font color=red>FOTO</font>

18 aprel 2012 12:21 (UTC +04:00)

Bakı - APA-Economics. Bu gün Azərbaycanın kənd təsərrüfatı naziri İsmət Abasov BMT-nin Ərzaq və Kənd Təsərrüfatı Təşkilatının (FAO) baş direktoru Joze Qratsiano da Silva ilə görüşüb.

Kənd Təsərrüfatı Nazirliyinin mətbuat xidmətindən “APA-Economics”ə verilən məlumata görə, görüşdə Azərbaycanla FAO arasında əlaqələrin ikitərəfli və çoxtərəfli formatda daha da möhkəmlənməsi istiqamətində atılan mühüm addımlar müzakirə olunub.

Nazir İsmət Abasov bildirib ki, ölkəmiz bütün sahələrdə olduğu kimi, aqrar sahədə də inkişaf edir. Azərbaycan hökuməti bu sektorun inkişafına hər il dövlət büdcəsindən vəsait ayırır. Son 5 ildə Azərbaycan iqtisadiyyatında ÜDM bir neçə dəfə artıb. Kənd təsərrüfatının inkişafı məqsədilə həyata keçirilən layihələrdən də danışan nazir əlavə edib ki, hazırda 4 layihə tamamlanıb, 9 layihənin işi isə davam etdirilir. Gələcəkdə qurumun region ofisinin yaradılması və birgə layihələrin hazırlanması planlaşdırılır. Bu da ikitərəfli münasibətlərin inkişafına mühüm töhfələr verəcək.

FAO-nun baş direktoru Joze Qratsiano da Silva isə Azərbaycanda olmaqdan məmnunluğunu ifadə edərək deyib ki, Azərbaycanla təşkilat arasında əlaqələr yüksələn xətlə inkişaf edir. Bakıda keçiriləcək FAO-un Avropa üzrə 28-ci Regional Konfransına da toxunan qurumun baş direktoru vurğulayıb ki, beynəlxalq tədbirlərə ev sahibliyi etməsi Azərbaycanın geniş imkanlara malik olduğunu bir daha sübut edir.

Görüşdə təşkilatın fəaliyyətinin perspektivləri ilə bağlı məsələlər ətrafında fikir mübadiləsi aparılıb.