Aqrar-sənaye kompleksi

Ana səhifə

Qazaxıstan kənd təsərrüfatı nazirinin müavini: “Azərbaycan və Qazaxıstan iqtisadi inkişafa görə region liderləridir”

19 aprel 2012 12:56 (UTC +04:00)

Bakı. Nicat Mustafayev - APA-Economics. Azərbaycan və Qazaxıstanın etibarlı ticarət partnyorları olmaq üçün zəmin var. «APA-Economics»in məlumatına görə, bu barədə Azərbaycanda səfərdə olan Qazaxıstanın kənd təsərrüfatı nazirinin müavini Marat Tolibayev bildirib.

Onun sözlərinə görə, Azərbaycan və Qazaxıstan iqtisadi inkişafa və adambaşına düşən gəlirlərin həcminə görə oxşar ölkələrdir. Belə ki, məhz bu iki ölkə regionda iqtisadi inkişafa görə liderdir.

İki ölkə arasında mövcud əlaqələrdən danışan nazir müavini Azərbaycanla Qazaxıstan arasında bu əlaqələrin getdikcə inkişaf edəcəyinə ümid edir: «Ötən il ərzində Qazaxıstan rekord həcmdə - 30 mln. ton taxıl istehsal edib. Biz hazırda bütün Mərkəzi Asiya və Qafqaz ölkələrinə taxıl istehsal edən iri ölkələr sırasındayıq. Ümid edirəm ki, Azərbaycan bu sahədə Qazaxıstanın etibarlı partnyoruna çevriləcək».

Qeyd edək ki, 2011-ci il ərzində Azərbaycan və Qazaxıstan arasında ticarət dövriyyəsi əvvəlki ilə nisbətən 18,5% azalaraq 275,6 mln. ABŞ dolları təşkil edib. Hesabat ilində idxal 26% azalma ilə 217,3 mln. dollar, ixrac isə 130,7% artımla 58,3 mln. dollar olub. İdxal səviyyəsinin enməsi Qazaxıstandan Azərbaycana tədarük olunan taxıl həcmlərinin 40%-ə yaxın azalması ilə izah olunur.

Xatırladaq ki, ötən il Azərbaycanda 2 458,5 min ton taxıl istehsal olunub.