Aqrar-sənaye kompleksi

Ana səhifə

İsveçrənin Azərbaycandakı səfiri kənd təsərrüfatı naziri ilə görüşüb

14 may 2012 13:57 (UTC +04:00)

Bakı - APA-Economics. Bu gün kənd təsərrüfatı naziri İsmət Abasov İsveçrənin Azərbaycandakı səfiri xanım Sabine Ulmann Şabanla görüşüb.

Nazirlikdən “APA-Economics”ə verilən məlumata görə, görüşün məqsədi Azərbaycanda BMT-nin Ərzaq və Kənd Təsərrüfatı Təşkilatı (FAO) tərəfindən həyata keçirilən və İsveçrə Əməkdaşlıq və İnkişaf Təşkilatı tərəfindən birgə maliyyələşdirilən “Ağdam rayonunun yeni salınmış qəsəbələrində qaçqın və məcburi köçkünlərin kənd təsərrüfatı imkanlarının artırılması” layihəsi ilə bağlı son durumun müzakirəsi və Azərbaycanla İsveçrə arasında kənd təsərrüfatı sahəsində ikitərəfli əməkdaşlığın müzakirəsi olub.

Nazir Azərbaycanla İsveçrə arasında iqtisadiyyatın digər sahələri ilə yanaşı, aqrar-sənaye kompleksi istiqamətində də əməkdaşlıq əlaqələrinin dinamik olaraq inkişaf etdiyini nəzərə çatdırıb. Bildirib ki, İsveçrədən Azərbaycana 2011-ci ildə 749 500 ABŞ dolları dəyərində əsasən emal edilmiş meyvə-tərəvəz və qoz-fındıq məhsulları, tütün, spirtli və spirtsiz içkilər, taxıl, un, nişasta və süddən alınan hazır məhsullar, kakao və unlu qənnadı məmulatları və digər müxtəlif ərzaq məhsulları idxal olunub, ölkəmizdən İsveçrəyə isə 308 min ABŞ dolları dəyərində əsasən meyvələr və qoz-fındıq, ət və balıqdan hazırlanmış məhsullar ixrac olunub.

Azərbaycanda aqrar sektorun inkişafı istiqamətində hökumət tərəfindən həyata keçirilən tədbirlərin və kənd təsərrüfatı sektorunda mütərəqqi dəyişikliklərin dəstəklənməsində İsveçrə Hökumətinin müəyyən töhfəsi olmuşdur. Belə ki, FAO tərəfindən 2007-ci ildən etibarən Azərbaycanda həyata keçirilən “Azərbaycan Respublikasının Ağdam rayonunun yeni salınmış qəsəbələrində məskunlaşmış məcburi köçkünlər və qaçqınlar üçün kəndin inkişafında potensialın artırılması” layihəsinin maliyyələşdirilməsində Azərbaycan Respublikası Hökuməti ilə yanaşı İsveçrə hökuməti də iştirak edir.

Nazir İsmət Abasov Azərbaycanla İsveçrə arasında kənd təsərrüfatı sahəsində əməkdaşlığın inkişaf etdirilməsi məqsədilə bir sıra istiqamətlərdə təkliflərini nəzərə çatdırıb.

Səfir səmimi qəbula görə öz minnətdarlığını bildirərək, həyata keçirilən layihənin verdiyi səmərədən danışıb və nazir İsmət Abasovu Azərbaycanda FAO tərəfindən həyata keçirilən və İsveçrə Əməkdaşlıq və İnkişaf Təşkilatı tərəfindən birgə maliyyələşdirilən “Ağdam rayonunun yeni salınmış qəsəbələrində qaçqın və məcburi köçkünlərin kənd təsərrüfatı imkanlarının artırılması” layihəsinin mayın 17-də Ağdam rayonunda keçiriləcək rəsmi bağlanma mərasiminə və mərasimdən əvvəl keçiriləcək kənd təsərrüfatı sərgisinə dəvət edib.