Aqrar-sənaye kompleksi

Ana səhifə

Kənd Təsərrüfatı Nazirliyi Şəkidə seminar-müşavirə keçirib

05 iyun 2012 15:45 (UTC +04:00)

Bakı. Vahab Rzayev - APA-Economics. Bu gün Azərbaycan Kənd Təsərrüfatı Nazirliyi Şəki şəhərində şəhər və rayon icra hakimiyyətləri başçılarının aqrar məsələlər üzrə müavinləri, ərazi-kənd təsərrüfatı idarələrinin rəisləri, maldarlıq üzrə dövlət və özəl damazlıq təsərrüfatlarının rəhbərləri, “Aqrolizinq” ASC vasitəsilə damazlıq düyə alan sahibkarlar, bələdiyyə sədrləri, orta və iri heyvandarlıq təsərrüfatlarının başçılarının, fermerlərin iştirakı ilə “Heyvandarlıqda damazlıq-seleksiya işləri”nə həsr olunmuş seminar-müşavirə keçirib.

Nazirlikdən “APA-Economics”ə verilən məlumata görə, tədbirdə kənd təsərrüfatı naziri İsmət Abasov ölkə prezidenti İlham Əliyevin müvafiq Sərəncamı ilə təsdiq edilmiş “2008-2015-ci illərdə Azərbaycan Respublikasında əhalinin ərzaq məhsulları ilə etibarlı təminatına dair Dövlət Proqramı”na uyğun olaraq ət istehsalının kəsilmiş çəkidə 340 min tona, süd istehsalının 2,4 mln. tona çatdırılmasının qarşıda duran əsas vəzifə olduğunu nəzərə çatdıraraq, heyvandarlığın intensiv inkişaf etdirilməsi, birinci növbədə mal-qaranın cins tərkibinin yaxşılaşdırılmasının vacibliyini qeyd edib.

Nazir mal-qaranın cins tərkibinin yaxşılaşdırılması məqsədilə son 3 ildə və bu ilin 5 ayında ölkəyə 4 350 baş damazlıq heyvan gətirildiyini diqqətə çatdırıb. Bildirilib ki, son 5 ildə ölkə üzrə 230 738 baş heyvan süni mayalanıb və 133 706 baş bala alınıb.

Nazir “Damazlıq heyvandarlıq haqqında” qanununun qəbul edildiyini və bu qanunda heyvandarlıqda damazlıq-seleksiya işlərinin əks olunduğunu seminar iştirakçılarının nəzərinə çatdırıb.

İ.Abasov maldarlıq və camışçılıq üzrə 10 dövlət və 53 özəl damazlıq təsərrüfatının fəaliyyətini yüksək qiymətləndirib. O qeyd edib ki, ölkədə 750 min baş cins mal-qara var ki, bu da ümumi naxırın 28%-ni təşkil edir və bununla belə damazlıq-seleksiya işinin əsas məqsədi heyvanlar arasında yüksək məhsul verən mal-qaranı seçib, onların sayını artırmaqdır.