Aqrar-sənaye kompleksi

Ana səhifə

Azərbaycanda Kənd İnvestisiyaları Layihəsinin ikinci mərhələsi başlanıb

06 iyul 2012 10:37 (UTC +04:00)

DB-nin Bakı ofisindən «APA-Economics«ə verilən məlumata görə, layihənin məqsədi icmaların idarə etdiyi kənd infrastrukturuna çıxışın təkmilləşdirilməsi və kənd ev təsərrüfatlarının iqtisadi fəaliyyətinin genişləndirilməsindən ibarətdir. Layihə nəticəsində Azərbaycanda təxminən 1,5 mln. kənd sakini infrastruktura və sosial xidmətlərə daha yaxşı çıxış əldə edəcək.

AzKİL II-nin maliyyələşdirilməsi üçün nəzərdə tutulan ümumi dəyəri 53,6 mln. dollar təşkil edən məbləğin 23,6 mln-u hökumətin payına düşəcək. Bu yeni layihə özündən əvvəlki çox uğurlu layihənin nəticələrinə əsaslanır. Həmin layihə 600 min fermerin gəlirlərinin artırılmasına, 700 min nəfəri əhatə edən irriqasiya xidmətinin təkmilləşdirilməsinə və 150 min kənd sakininin təmiz içməli su ilə təmin edilməsinə öz töhfəsini verib.

DB-nin sosial inkişaf üzrə baş mütəxəssisi və Layihə Lideri Daniel Ouen bildirib ki, AzKİL çox müvəffəqiyyətli proqram kimi geniş şəkildə tanınmaqdadır: “Layihə ötən yeddi ildə yoxsul əhalinin rifahı və iqtisadi perspektivlərinə xidmət etmək, o cümlədən onların yaxşılaşdırılması məqsədilə icmanın imkanlarının genişləndirilməsinə və yerli inkişafa investisiya qoyuluşu istiqamətində hərtərəfli dividentlər nümayiş etdirib. AzKİL II özündən əvvəlki layihənin faydalarından kənarda qalmış rayonları əhatə edəcək, kənd yoxsullarının gəlir imkanlarının yaradılmasına dəstək verəcək, icma tərəfindən müəyyən olunan kənd infrastrukturuna investisiyaların maliyyələşdirilməsini davam etdirəcək, icmaların inkişaf prioritetlərinin müəyyənləşdirilməsi, planlaşdırılması və səmərəli həyata keçirilməsi məqsədilə yerli bələdiyyələrlə tərəfdaşlıq çərçivəsində icmaların potensialını gücləndirəcək”.

Azərbaycan əhalisinin təxminən yarısı və ölkənin işçi qüvvəsinin təxminən 40%-i kənd yerlərində yaşayır. Son bir neçə il ərzində əsas infrastruktura dövlət sərmayəsinin əhəmiyyətli dərəcədə artmasına baxmayaraq, kənd əhalisinin dövlət xidmətlərinə çıxışı və onun keyfiyyəti sahəsində bir sıra çatışmazlıqlar qalmaqdadır. Əsas problem infrastruktur çatışmazlığıdır ki, bu da kənd yolları, irriqasiya və drenaj sistemlərinin kifayət qədər olmamasında müşahidə olunur.

DB-nin Cənubi Qafqaz üzrə yeni regional direktoru Henri Kerali deyib ki, AzKİL kimi proqramlar Azərbaycanın kənd yerlərində dövlət xidmətlərinin göstərilməsinin formalaşdırılması üçün çox mühümdür: “Bu layihə kənd yoxsullarına prioritet inkişaf ehtiyaclarının müəyyənləşdirilməsi istiqamətində əsas qərarvericilik səlahiyyəti verib və infrastrukturun təkmilləşdirilməsi vasitəsilə 1,5 mln-dan çox insan üçün xidmətlərə çıxışı əhəmiyyətli dərəcədə yüksəldib. Xüsusilə AzKİL II çərçivəsində kənd təsərrüfatında məhsuldarlığın və fermerlərin gəlirlərinin artırılması, o cümlədən benefisiarların yaşam keyfiyyətinin yüksəldilməsinə aparacaq təkmilləşdirilmiş kənd infrastrukturuna çıxışın gücləndirilməsinə nail olunmaq niyyətindədir”.

Bu layihənin məqsədlərinə kənd infrastrukturu sahəsində tələbat əsasında həyata keçirilən mikrolayihələrin maliyyələşdirilməsi vasitəsilə nail olunacaq. Potensial investisiyalar icmalar tərəfindən müəyyən olunan prioritet ehtiyaclara əsaslanan əsas iqtisadi infrastrukturu (ikinci dərəcəli yolların, içməli su sistemlərinin, irriqasiya infrastrukturunun, elektrik enerjisi transformatorlarının bərpası kimi) və sosial infrastrukturu (məktəblərin və xəstəxanaların təmiri və tikintisi kimi) əhatə edir. Layihənin hədəf qrupu 1000 nəfərdən 10 000 nəfərə qədər insanı əhatə edən kənd icmalarıdır. Layihə həmçinin daha öncə təkmilləşdirilmiş infrastrukturdan faydalanan seçilmiş sayda icmada gəlir yaradan pilot fəaliyyətləri də dəstəkləyəcək.

Qeyd edək ki, Azərbaycan 1992-ci ildən DB-nin üzvüdür və bu günə kimi bankdan 43 layihə üzrə ümumilikdə 3,1 mlrd. dollar məbləğində vəsait alıb.