Aqrar-sənaye kompleksi

Ana səhifə

Azərbaycan Beynəlxalq Üzüm və Şərab Təşkilatına üzv olacaq - FOTO

Azərbaycan Beynəlxalq Üzüm və Şərab Təşkilatına üzv olacaq - <font color=red>FOTO</font>

08 oktyabr 2012 15:27 (UTC +04:00)

Bakı - APA-Economics. Bu gün kənd təsərrüfatı naziri İsmət Abasov Beynəlxalq Üzüm və Şərab Təşkilatının baş direktoru Federiko Kastelluççi ilə görüşüb.

Kənd Təsərrüfatı Nazirliyinin mətbuat xidmətindən “APA-Economics”ə verilən xəbərə görə, görüşdə üzümçülük və şərabçılıq sahəsində təşkilatla əməkdaşlığın perspektivləri müzakirə edilib.

Nazir İsmət Abasov Azərbaycanda üzümçülüyün və şərabçılığın inkişaf istiqamətləri, perspektivləri barədə ətraflı məlumat verərək, həyata keçirilən tədbirlər nəticəsində üzümçülüyün yüksək templə inkişafına nail olunduğunu, emal müəssisələrinin maddi-texniki bazasının möhkəmləndirildiyini və güclü kadr potensialının yarandığını qonaqların nəzərinə çatdırıb.

İ.Abasov qeyd edib ki, Kənd Təsərrüfatı Nazirliyi Azərbaycanın Beynəlxalq Üzüm və Şərab Təşkilatına üzv olması məqsədilə hökumətə təklif verib, məsələyə dair aidiyyəti dövlət qurumları tərəfindən ümumilikdə müsbət münasibət bildirilib. Hazırda üzv olma istiqamətində daxili prosedurlar həyata keçirilir.

Qeyd edilib ki, Azərbaycanda istehsal olunan şərablar və digər spirtli içkilər Almaniyada təşkil olunan “Yaşıl Həftə”, cari ilin may ayında Fransanın Burqundiya regionunun Yon bölgəsində təşkil olunan “Oserin üzüm gülləri” şərab festivalında, Rusiyada, İtaliyada və digər ölkələrdə təşkil olunan sərgilərdə nümayiş etdirilir.

Nazir Azərbaycan və Beynəlxalq Üzüm və Şərab Təşkilatı arasında əməkdaşlığın genişləndirilməsinə bir sıra təkliflər səsləndirib. Bu təkliflərdə Azərbaycanın Beynəlxalq Üzüm və Şərab Təşkilatına üzv olmasından sonra ölkədə üzümçülük və şərabçılıq sektorunun beynəlxalq tələblərə uyğun təşkil edilməsi sahəsində təşkilatla əməkdaşlığın genişləndirilməsi, üzümçülük və şərabçılıq sahəsində beynəlxalq standartların və təcrübənin Azərbaycanda elmi-tədqiqat sahəsində tətbiq edilməsi məqsədilə Azərbaycan Elmi-Tədqiqat Üzümçülük və Şərabçılıq İnstitutu ilə təşkilat arasında təmasların genişləndirilməsi və birgə tədqiqat işlərinin aparılması əksini tapıb. Eləcə də üzümçülük və şərabçılıq sahəsində nou-haunun və elmi yeniliklərin Azərbaycanda tədris olunmasının genişləndirilməsi məqsədilə Azərbaycan Dövlət Aqrar Universitetinin Şərabçılıq fakültəsinin müəllim heyəti və tələbələri üçün Beynəlxalq Üzüm və Şərab Təşkilatının mənzil-qərargahına səfərlərin təşkil edilməsi, Təşkilat vasitəsilə digər ölkələrdə stajkeçmə imkanlarının araşdırılması, xarici ölkələrin müvafiq ali təhsil müəssisəsi arasında birbaşa əlaqələrin yaradılması da təklif olunur.

Beynəlxalq Üzüm və Şərab Təşkilatının baş direktoru Federiko Kastelluççi Azərbaycanda üzümçülüyün və şərabçılığın inkişafına elmi-metodoloji köməkliklərin, eyni zamanda üzüm sortlarının keyfiyyətinin artırılması istiqamətində lazımi köməkliklərin göstərilməsinin mümkünlüyünü bildirdi. Baş direktor bu təşkilatın Assambleyasının növbəti iclasının Azərbaycanda keçirilməsini təklif edərək, Azərbaycan nümayəndə heyətini həmin təşkilata dəvət edib.